Na luna di Augustus
ORANJESTAD (AAN): Oficina Central di Estadistica (CBS) ta defini un bestaansminimum como e nivel minimo di entrada cu ta wordo percibi necesario pa un persona of famia por funciona den sociedad di un manera adecuado y socialmente aceptabel.
Ora di uza e definicion “Bestaansminimum”, en realidad ta wordo referi na un “Sociaal Bestaansminimum” y no na e definicion literal di un “Bestaansminimum” cu ta referi na “e suma di placa necesario pa cumpra e bienes y servicionan cu ta wordo considera necesario pa biba un bida liber di privacionnan basico” (Nacionnan Uni).
Un indice a wordo crea pa e “Bestaansminimum” door di calcula e costo di tur recursonan esencial cu un adulto promedio ta consumi durante un luna. Cada luna e indice aki ta wordo ahusta, a base di e prijsnan di alimento, paña, vivienda, transporte y otro articulonan den e canasta. E bestaansminimum actual ta wordo basa riba e rapport “Bestaansminimum 2010” publica door di CBS na December 2010, y cual ta wordo actualisa mensualmente segun e CPI.
E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña.
Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”. Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 15+) y un peso di 0.3 pa cada mucha (edad 0- 14).
E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-14). Na augustus 2026, e bestaansminimum mensual pa un hogar consistiendo di 2 adulto y dos mucha (edad 0-14) ta Afl. 5,663, un aumento di Afl. 144 compara cu augustus 2025 (Afl. 5,519).
E aumento aki a wordo causa principalmente door di aumentonan di Afl. 86 y Afl. 35 den e sectornan “Cuminda y bebida no alcoholico” y “Transporte”, respectivamente. E caida mas grandi na augustus 2026 a wordo registra den e sector di “Paña y sapato” (Afl. -5).
Un solo adulto: Na augustus 2026 e bestaansminimum mensual pa un hogar cu ta consisti di un solo adulto ta Afl. 2,697, cual ta resulta den un deficit di entrada di Afl. 690. Esaki ta representa un aumento di Afl. 48 compara cu e deficit observa un aña pasa (Afl. 642). E deficit aki ta e di dos mas halto registra pa luna di augustus durante e ultimo 6 aña.
