Segun Chun Luk di Universidad di Aruba:
ORANJESTAD (AAN): Chun Luk, docente y Decano di Facultad di Ley na Universidad di Aruba, den un entrevista cu DIARIO a papia tocante e desaroyo di e facultad di ley y e oportunidadnan cu Universidad di Aruba ta ofrece na studiantenan cu kier sigui un estudio universitario na Aruba.
Luk a splica cu e facultad di ley ta un parti importante di Universidad di Aruba y cu durante añanan e programa a sigui crece y desaroya. Segun e, e intencion ta pa sigui ofrece un educacion di nivel universitario cu ta relevante pa Aruba, pero cu na mes momento ta conecta cu e mundo exterior.
E docente a duna di conoce cu Universidad di Aruba tin un bon programa di ley, ta programanan di un nivel hopi halto y ta wordo evalua door di organisacionnan externo. Den caso di e programa di ley, NVAO ta evalua cu e programa ta na mes un nivel halto cu ta wordo exigi pa programanan na Hulanda y Belgica.
Señor Luk a enfatisa cu ta e intension di Universidad di Aruba pa sigui mantene e nivel aki door di ekipa e docentenan cu e hermentnan necesario cu nan tin mester pa keda duna enseñansa di un bon calidad mientras ta adapta na e mundo digital pa ekipa studiantenan miho pa nan futuro carera den comunidad.
Segun e, evolucionnan den tecnologia ta cambiando hopi cos entre otro inteligencia artificial cu ta afectando e manera di duna y ricibi educacion. Universidad a adopta un maneho a base di esaki den facultad pa asina tanto docentenan como studiantenan uza e hermentnan aki di un manera etico sin bira dependiente di nan pero ta keda critico usando nan mesun pensamento y creatividad pa introduci ideanan nobo.
Luk a termina bisando cu tin hopi interes den e facultad di ley na Universidad di Aruba na unda cu pa e ultimo añanan ta basta stabiel mirando e cantidad di studiantenan cu ta drenta. E interes, segun e, no ta solamente den hobennan, pero tambe den esnan cu ya ta trahando, y adultonan cu kier tuma un next step den nan carera.
E ta invita tur hende cu ta interesa pa studia ley, pa bishita e open housenan y college fairs cu ta keda anuncia riba paginanan social di Universidad, na unda e siguiente lo tuma luga na november proximo.
