Fiesta di San Juan ta prueba di planificacion Arubano enfrente clima
*E demandanan di poblacion creciente ta un tema cu DIARIO a presenta
*DIARIO a adverti pa e condicionnan actual di tempo dificil pa pronostica
ORANJESTAD (AAN) — E yobidanan fuerte cu a presenta nan mes na Aruba, sigur ta algo di preocupacion pa tur sector y asina tambe di DIARIO, e matutino di Aruba, cu na un forma continuo a alerta pa e realidad cu un comunidad mester tene cuenta cu tur aspecto cu crecemento di comunidad y cambio den mentalidad ta presenta.
Manera DIARIO a splica na tanto ocasion, e hecho cu Meteorologia ta hunga un papel sumamente importante den comunidad, ta debi na e hecho cu condicionnan di tempo, directamente ta afecta hende y comunidad.
Ora papia di Aruba, ta papia di un Pueblo cu a biba cu naturaleza manera su tradicionnan ta proba.
Fiesta di San Juan por ehempel ta suscribi e importancia cu historicamente e Pueblo Arubano ta duna na condicionnan di tempo, cu ta determinante pa bida di cada dia y bienestar di pais y hende.
E Fiesta di San Juan ta prepara Aruba pa e probecho cu plantacion ta representa den cultivo di cuminda cu hende mester pa keda na bida.
Ta pasobra mester di yobida pa tin cosecha, e Arubiano ta prepara su tereno en espera di e temporada di horcan, cu ta produci yobidanan cu mester pa produccion di horticultura y agricultura.
Segun tradicion Arubano, cu a haya su inicio prome cu henter Pueblo tabata tin oportunidad pa bay studia na Universidad, ta subi fli den e tempo di biento di Cuaresma cu ta haci laman bruto pa piscador.
Biba cu tempo a dicidi con y unda e Arubano ta construi su cas, cu tabata parti di planificacion familiar ya cu mester tabata tin cas prome cu bruid.
Ora indiga den e construccion di casnan segun tradicion di Aruba, por nota con ta tene condicionnan di tempo na consideracion. DIARIO a dedica varios serie di articulo pa splica cu ora ta atende cu un pais, mester conoce su historia y tradicionnan cu tin un motibo.
Tempo moderno a bati na porta. Construccion a cambia pero tambe menos atencion ta wordo dedica na lugarnan y forma di construccion di casnan den e crecemento rapido di poblacion di Aruba, cu no ta crece solamente a base di motibonan natural di nacemento pero tambe a base di immigracion.
Na e momento cu Gobierno Wever-Croes a tuma e decision inteligente pa stop mas proyecto hotelero, diario a expresa su sosten pa e decision aki y a mustra riba e infrastructura cu Aruba no por ofrece na un comunidad cu ta crece for di su posibilidad natural.
Na un forma specifico DIARIO a atende cu e problema serio di vivienda. Na momento cu temporada di horcan 2024 a bati na porta, DIARIO no a bati alarma sin contenido pero a pidi tur hende pa bay ocupa nan mes cu posibilidad di problema cu nan situacion ta trece cune.
Crecemento rapido di un poblacion ta trece cune cu e comunidad mester tin continuamente sumanan enorme di placa pa crea mas facilidad cu mester riba tereno di vivienda entre otro pero tambe riba tur loke e infrastructura ta trece cune y ta rekeri ampliacion di vigilancia di expertonan costoso pa cual un pais mester ta prepara.
Tradicionalmente e Arubano ta conoci cu lugarnan cu ta peligroso durante temporada di yobida. Pero mester admiti cu na Aruba mescos cu ta pasa na tur parti di mundo, hende kier ignora loke naturaleza ta exigi pa haci prioridad, cu ta encera cu no ta mishi cu e realidad di naturaleza cu hende no por cambia.
No na Aruba so pero rond mundo e problema di casnan moderno cu no ta tene cuenta cu condicionnan di clima, ta presenta. No na Aruba so, pero rond mundo, hende ta na careda pasobra a construi cas na un sitio cu historicamente ta conoci cu ta pasashi di yobida cu manera DIARIO a splica ta busca su ruta natural.
Na Aruba historicamente a construi tanki y dam pa warda awa pero tambe ta tene cuenta den construccion cu e sitio cu ta construi vivienda.
Manera ya bisa, e hecho cu comunidadnan mundial moderno ta bay contra naturaleza, hende ta bira vitima di situacionnan cu awe nos ta lamenta y nos mester yuda soluciona, pero ta exigi tambe planificacion directo y hasta ampliacion di ley, unda y con por construi cas na un forma responsabel cu ta evita gastonan tremendo di comunidad na momento di adversidad pero tambe den realizacion basico di loke un comunidad mester pa acomoda hende.
Mundialmente cambio di clima tin hende na careda. Na Aruba tambe. Esaki manera na tanto ocasion DIARIO a trece dilanti, mester exigi pa tin control riba tur vivienda y surgimento di barionan na Aruba.
Na inicio di temporada di horcan, DIARIO a spierta pa resultado di yobidanan cu intensidad cu no por pronostica pero ta depende di nubianan independiente den condicionnan di tempo apropia.
Aruba awor como un comunidad den cual fraternidad y union ta central, mester duna asistencia na tur cu a wordo perhudica no solamente pa medio di Gobierno pero tambe como miembronan di bario.
Por lo pronto por spera yobida cualkier momento, manera ta normal na cambio di aña cu ta hiba mundo na un futuro den cual hende mester bolbe pa un gran parti na e sentido di responsabilidad cu antes tabata tin enfrente naturaleza cu hende no por domina manera a keda sigur confirma durante e prome 25 aña Siglo 20, cu un lista largo di tragedia y drama natural di un clima cu hende a destrui.
