Jeanine Tromp, 'Gender Consulent':
ORANJESTAD (AAN) – E 'Gender Consulent' di CEDEHM, Jeanine Tromp, den entrevista cu DIARIO a duna di conoce cu aunke nan ta traha pa e desaroyo di hende muher, banda di dje a ripara cu nan mester duna hende homber ayudo, tambe.
Door di esaki, CEDEHM tur aña ta duna e parti di concientizacion, riba Dia Mundial di Hende Homber, cu ta dia 19 di November.
Pa e ocasion aki CEDEHM ta organizando un charla pa hende homber, ya cu e tema e aña aki ta “Men’s Health”, kiermen Salud di Hende Homber. E lo tuma lugar Diamars awo dia 19 di November, di 7 pa 9’or di anochi, na Paradera 145-C (MFA). Entrada ta gratis.
E aña aki kier enfoca hopi riba salud di hende homber y CEDEHM tambe kier haci esaki, pa e ser masculino cuida su salud, y hopi ta wordo papia di “ban crea un comunidad di hende homber saludabel” pero tambe pa tuma accion.
“Pa cu esaki, nos di CEDEHM a acerca meneer Romulo Fingal, ken ta un persona den nos comunidad cu tin su edad halto, pero ta duna asina hopi ayudo, concientiza hende homber y a skirbi dos buki tocante su trayecto cancer cu el a pasa aden. E persona aki ta esun cu ta bay duna e charla aki y ta bay papia tocante e importancia pa hende homber cuida su salud, kico ta importante p’e haci, kico ta e cosnan cu e tin cu tene cuenta cu ne, y a base di esey, e aña aki nos kier concientiza e hendenan homber pa bin y scucha un tiki di con pa mehora nan salud”, Jeanine Tromp a comenta.
Jeanine a agrega cu un di e temanan cu CEDEHM kier pone enfoke pa 2025 ta pa concientiza hende homber cu nan salud mental tambe ta importante.
Jeanine a splica cu CEDEHM no tin datonan tocante cuanto hende homber tin problema di salud mental, y e parti dificil ta cu nan no ta acerca, asina facil, instancianan pa pidi ayudo.
“Nos tin cu busca un forma con pa yuda hende homber, por ta yega cerca nan na pia di trabao pa duna nan e charla pa nan tin mas conocemento di e ayudo cu eyfo nan tin. Akinan mes, na CEDEHM, nos ta duna Fundacion Hende Homber un espacio, y algun di nan ta bin ta papia y nos ta dirigi nan na unda nan mester haya ayudo”, Janine Tromp a señala.
