Naturalesa Caribense den 'spotlight' pa medio di proyecto pa proteccion di medio ambiente

ORANJESTAD (AAN)/Kralendijk - E naturalesa bunita y unico di e seis isla den Caribe Hulandes lo ta e actor principal den e pelicula WOW! Caribbean Nature Uncovered, cu lo ser presenta den cine.

                E proyecto aki ta trece diferente partner hunto, incluyendo Wereld Natuur Fonds (WWF-NL) y Dutch Caribbean Nature Alliance (DCNA). E meta ta pa inspira y motiva e publico pa proteha naturalesa, cu un enfoke riba e vulnerabilidad y e resiliensia di e ecosistemanan special aki. 

Hunto pa proteha naturalesa

                WWF-NL ta dedica pa mas naturalesa via proteccion y restauracion di naturalesa rond mundo, tambe riba e islanan Caribense Hulandes. E islanan aki tin rond di nan rifnan di coral y palonan di mangel y especie marino iconico manera bayena, dolfijn, tribon y turtuga, cual ta naturalesa special. y e naturalesa aki ta contribui na cuminda y entrada di e habitantenan y na felicidad di bishitantenan cu e islanan ta ricibi regular.

                WWF-NL ta traha riba e islanan hunto cu habitantenan y partnernan local pa proteha y restaura e naturalesa regional. E programa di Caribe Hulandes di WWF-NL ta principalmente enfoca riba ecosistemanan na costa y animalnan marino iconico. 

Conscientisacion

                Aparte di proteha especienan y areanan, education y conscientisacion tambe ta un parti importante den e programa. P'esey WWF-NL ta traha hunto cu partner local DCNA pa desaroya proyecto di educacion pa hoben riba e seis isla.             E colaboracion cu WOW! Caribbean Nature Uncovered ta un paso bunita den e mision pa proteccion di naturalesa, caminda naturalesa di e islanan Caribense ta ricibi e atencion cu e merece.

                E islanan aki ta carga un biodiversidad rico cu hopi biaha no ta ser aprecia of hasta ignora. Via un pelicula unico, e productornan ke pa tur hende por disfruta di naturalesa di e islanan y stimula e cuido comparti pa e naturalesa aki. 

Proyecto di multimedia

                WOW! Caribbean Nature Uncovered ta un proyecto ambicioso di multimedia inicia pa e fundacion 360º of Innovation for di Aruba y MN Media Group for di Hulanda. WOW! ta bay mas leu cu solamente un pelicula den cine.            Aparte di e pelicula, nan lo traha 6 documental mas. Tambe lo tin un podcast, un plataforma di educacion y un database. Talento local riba e islanan lo haya e oportunidad pa participa den e proyecto, cual ta un tremendo oportunidad pa e talentonan y e ta duna e proyecto e input local necesario. 

Conexion

                Arno Verhoeven, director di DCNA: “Pa mustra con naturalesa ta un parti integral di bida riba e islanan, e pelicula ta toca e curason, emocion y alma di hende. Ta e mision di e productornan y e partnernan pa mustra e bunitesa di e islanan Caribense y di asina crea un movecion mundial pa conserva e ecosistema unico aki.”

                Bianca Peters, co-productor di WOW!: "Tur dia e bunitesa y vulnerabilidad di naturalesa riba e islanan ta toca mi profundo. Ta manera mi ta descubri algo nobo tur bes den e biodiversidad rico cu e islanan tin pa ofrece.

                Cu WOW! nos kier mustra no solamente e naturalesa impactante, pero tambe crea un conexion emocional entre e islanan y e Reino Hulandes como un totalidad. Si nos ta mas sincero, cuanto hende na Hulanda conoce e islanan y e naturalesa rico riba e islanan di berdad?

Mi ta kere cu si nos por comparti e amor pa nos naturalesa, nos por crea un conexion potente riba hopi tema den nos sociedad. Ta nos mision pa cu e pelicula, e documentalnan, e podcast, e plataforma di educacion, e programa di talento y e database, nos por crea un aprecio y responsabilidad comparti pa nos medioambiente, pa generacionnan futuro tambe por ta impresiona mescos cu nos. Mi ta sumamente agradecido cu nos ta traha hunto cu WWF-NL y DCNA riba e proyecto aki. Solamente hunto nos por haci e diferencia."

_________________________________________________________________

Potret pelicanen, credit: WOW! / MN Media Group

Potret crhuchubi, credit: Kenny Ranking

Potret, credit: WOW! / EMS Films