Nathalie Maduro, directora di Santa Rosa:
*Cuminzando cu un proyecto di coleccion di awa di yobida
ORANJESTAD (AAN) – Nathalie Maduro, den entrevista cu DIARIO a referi na e oportunidadnan nobo cu Santa Rosa lo atende durante 2024, entre otro un bishita di studiantenan di Universidad di Utrecht, cu conhuntamente cu Universidad di Aruba, lo bin haci un estudio tocante e oportunidadnan cu lo por tin, pa locual ta trata coleccion di awa di yobida.
` “Nos ta wak cu awa ta keda un limitacion, WEB un tremendo partner di Santa Rosa ta ofrece nan awa na un prijs mas abao, pero toch nos ta sinti cu hopi awa di yobida ta wordo perdi, y cu ta causa un problema no solamente pa nos naturaleza, y e erosion cu e ta trace cune, pero tambe pa comercio. Tin partinan di Playa cu ora ta bao di awa cu hendenan tin cu cera of no por bay na e tiendanan. Nos ta hopi contento cu nos a logra di haya e team di studiantenan aki, y cu nos lo por tin e datonan necesario pa convence e otro departamentonan cu ta encarga cu infrastructura, y vooral e ‘bow plannan’ di cas, pasobra si nos ta papia di sostenibilidad, nos tin cu bay wak kico ta loke naturaleza ta ofrece na nos gratis, y con nos como departamentonan di gobierno y como personanan cu ta biba na Aruba, con nos tambe por colecta y haci miho uso di awa di yobida”, Nathalie Maduro a subraya.
Maduro a sigui bisa cu un factor cu LVV a ripara cu ainda no ta duidelijk eyfo y cu nan kier haci tambe algun charla, conhuntamente por ehemplo cu DIMP, ta e incentivonan cu gobierno ta pone pa e personanan den sector primario.
“Pues, cu nan no ta paga belasting riba productonan fresco. Pero aworaki cu e BBO na frontera, mi por bisa cu nos ta hayando eigenlijk yamadanan di cunukero cu ta un tiki preocupa, pasobra nan tin cu paga toch algo riba ekipo y material cu nan tin cu importa. Pues esey nos a trece dilanti na Minister Arends cu ta encarga cu e parti di naturaleza y sector primario, pero toch tin hopi oportunidad y hopi incentivo cu gobierno pa yuda esnan cu kier switch for di HOPIS pa comercial.
Locual mi ta bisa semper, nos tin cu come tres bez pa dia, e demanda pa productonan local ta grandi, si tin cierto retonan ainda, ohala cu como Santa Rosa nos por resolve nan tur, pero tin aspectonan cu kizas ta cay bao di otro departamento. Y nos tin, di nos banda, cu convence nan pa nan wak e ora ey pakico ta importante pa trece cierto cambionan kizas den ley, of den manehonan, cu por sostene e sector primario”, Nathalie Maduro a señala.
El a agrega cu toch cunukeronan tin Qredits, cu ta duna nan training, y cu kier duna nan financiamento pero ainda tin cierto di nan cu no ta cay bao di e grupo aki. “Anto ohala nos por haya mas cooperacion di banconan, pa yuda nan cu fianzanan chikito cu toch lo por incentiva nan pa lanta un negoshi chikito”, Directora di LVV a señala.
