Natacia ter Beek ta empleado ehemplar di luna di augustus na HOH

ORANJESTAD (AAN): Tur luna Horacio Oduber Hospital (HOH) su enfoke ta pa elogia coleganan cu di un forma of otro ta destaca

y ta bay e “extra mile”. Pa luna di augustus a toca turno pa elogia colega Natacia ter Beek cu ta labora como dialyse assistant na departamento di Dialyse.

Manera tur dia, Natacia ter Beek a yega trabou, faltando solamente algun ora p’e baha cu vakantie. Sinembargo, e no a spera e sorpresa cu su coleganan a organisa pe. Un sorpresa masha grandi ora di a mira su famia y su coleganan hunto cu hunta di directiva pa dun’e e merecido aprecio p’e trabao cu e ta haci n’e departamento di Dialyse.

            Natacia ta conta cu e ta gusta su trabao y cu e nominacion aki ta un motivacion pe sigui hacie mas miho posibel. Ela agrega cu hopi biaha su coleganan ta acerc’e si nan tin cualkier tipo di problema. Pa nan, Natacia ter Beek ta un persona di confiansa y e ta trata tur colega igual. Ademas, door cu e ta traha riba nan rooster, tur shift cu mester cambia, ta pidi Natacia tambe pa conseho y pa yuda soluciona problema den rooster cu por surgi y e ta hacie cu placer.

            Natacia ta un teamplayer cu ta yuda su coleganan unda cu e por. E mes ta tuma iniciativa si e tin un problema cu algo. E ta un persona positivo, semper cu sonrisa riba cara, transparente y semper profesional. E ta un persona cu ta cumpli cu su trabou den e ora stipula. Esnan cu Natacia ta brinda asistencia ta bisa cu e ta un persona cu hopi pasenshi, cu empatia, comprension y semper husto.

E ta gusta siña y desaroya su mes den su carera y mane su manager ta bisa: “She will pick your brain if that will let her grow as a human being and colleague!”

            Su enfoke ta pa hunto yega na e meta di e departamento y e organisacion. Un persona dedica y leal ne organisacion, colega y pashent.

            Banda di brinda cuido na pashentnan, Hospital ta consciente cu e tin un ekipo di riba mil empleado cu tur dia ta yega trabou cu e mesun meta, pa brinda cuido y salba bida. Hospital ta masha orguyoso di su empleadonan y ta un di e poco dunadonan di trabou cu tur luna ta anuncia un empleado di luna pa mantene su empleadonan contento, uni, motiva y cu un gana enorme pa sigui nan pasion den nan trabou na Hospital.

            Masha pabien Natacia cu e bunita reconocimento aki!