ORANJESTAD (AAN): Recientemente Minister di Deporte a reuni cu directiva di SV Bubali, cu a haci un bon presentacion amplio di nan proyecto Deportivo.
Presente na e reunion aki sr Ghisberto Figaroa, Presidente, sr Nicolas Quandus, secretario, sr Ryan Figaroa segundo secretario di SV Bubali. Nan a haci un presentacion di Powerpoint riba nan proyecto cu pa hopi tempo tin den ‘pipeline’.
Nan a ilustra cu riba nan propio forsa y sosten di Super Food a logra pone nan luznan, a agrega cu tabata un reto pa nan pero a logra e parti aki. Nan ambicion awor ta pa desaroya ful e compleho deportivo aki, cu cancha di futbol, cancha di tennis, cancha di beach tennis, veld di baseball pero nan concentracion awor aki ta riba e veld di futbol cu nan mester bay drecha y lanta 35 meter for di sub suela, pa motibo cu tin problematica di awa y cu un vision cu esaki lo ricibi su yerbe artificial.
Den e proyecto aki Gobierno como stakeholder ta bay yuda busca solucion y pa yega na e material cu mester pa yena e tereno aki cu lo ta costoso y den e di dos fase di e proyecto ta e yerbe artificial na unda cu FIFA y AVB ta hunga un rol na momento cu yega asina lew.
Minister Endy Croes a sigui elabora cu tambe di parti Gobierno ta bay acerca DOW pa yuda pa por cera e tereno parti dilanti pa e auto nan stop di draai riba e tereno aki. Un proyecto hopi ambicioso y hopi grandi, Minister Endy Croes a pidi directiva di Bubali pa ban traha den fase cu e proyecto aki, pa cuminsa na e parti cu ta mas importante prome, pa yena e tereno, yega te na e parti di veld cu yerba unda cu aki FIFA y AVB ta cay aden cu otro fondonan pa por yega na e yerba artificial y cera e yerba rond cu un heki.
Minister Endy Croes a sigui agrega cu den añanan nos dilanti lo sigui riba e proyecto ambicioso y grandi aki, pa logra veld di baseball, e canchanan di beachtennis, un ‘clubhuis’, futbol di sala, un proyecto pa deporte hopi bunita, un excelente Powerpoint presentacion, pero mester cuminsa un caminda y Minister Endy Croes a finalisa cu sigur ta yuda y duna sosten pa SV Bubali por logra realisa nan excelente proyecto deportivo.
