Nan uni forza pa desmantela cas cant’i lama, na Smith Blvd, unda adicto ambulante tin 8 aña ta biba

Robby Rosel ta gradici: KPA, Ploeg di BCI, team 97 y 197:

*Y a laga e area completamente limpi!

ORANJESTAD (AAN)—Pa mas cu 4 luna Bureau City Inspector (BCI) a busca haya sa, con a bin cu un adicto ambulante ta bibando cant’i lama, na haltura di Pyramid Condominium, situa na Smith Boulevard, unda hopi hende local y turistanan ta cana te Linear Park.

Robby Rosel, Relacionista Publico di BCI, den entrevista cu DIARIO, a menciona cu e adicto en cuestion, tin mas cu ocho aña bibando na cant’i lama eybanda, unda a traha un lugar pa keda meymey di mangrovenan.

E tin e area aki ocupa y ora e wordo cori pa e habitantenan cu ta biba alrededor of trahadornan di e oficinanan ubica den e vecindario, e ta bay na otro lugar cu e tin tambe y cu City Inspector tine den plan. Rosel a subraya cu nan tin cu bay poco, poco, pasobra nan mester busca e forma cu nan por yega haci e limpieza.

Diabierna awo, tabata tin accion hunto cu Cuerpo Policial y e ploeg di BCI.

“Awe mes, nos tin cu gradici Cuerpo Policial, e ploeg di Bureau City Inspector, Team 94 y Team 197 cu a traha conhuntamente, pa asina nos por a desmantela e lugar aki, lague completamente limpi, tanto pa e turistanan cu ta pasa eybao y tambe pa e habitantenan cu ta biba eybanda”, Rosel a señala.

Rosel a agrega cu nan a descubri un tubo unda ta distribui awa, y cu e persona aki tabata haci uso di dje. El a menciona cu e meter di awa cu tin eybanda ta pa e matanan cu tin den e area, pero pa basta dia caba el a wordo cera.

Pa realiza e accion aki y desmantela e lugar un grupo grandi di e instancianan menciona a bin hunto. E instancianan concerni lo sigui vigila e area pa e caso aki no ripiti. Tanto e team 94 como 297 lo sigui controla e sector aki y e otro lugar unda e persona sin lugar pa biba ta kedando, y esey lo wordo desmantela tambe.