No habri frontera cu Venezuela ta sostene advertencia DIARIO
- Democracia ta exigi pa atende problema matrimonial den cas
- Olanan di beach no por destrui loke a construi na tera firme
ORANJESTAD (AAN)- Ta di aplaudi cu na fin di e siman aki a drenta e informacion, cu Gobierno no ta habri frontera cu Venezuela completamente.
E decision ta completamente di acuerdo cu e posicion di DIARIO durante e siman aki pa loke ta trata e menasa grandi cu problemanan regional serio, ta produci pa Aruba.
E storianan di horor cu a desaroya dilanti costa di Aruba ta duna prueba di e problema serio cu, manera DIARIO cu prueba ta trece dilanti, ta sigui crece na Venezuela na caminda pa eleccionnan cu henter mundo ta tene na vista.
Venezuela ta parti di e problemanan regional y mundial total cu continuamente DIARIO ta presenta na su lectornan hunto cu e problemanan grandi cu ta sigui wordo genera na Planeta Tera y solamente por wordo bon atende na Aruba cu e concepto di pone interes di Aruba na prome lugar.
Democracia no ta deshaci di e hecho cu tur hende ta diferente. Esaki ta nifica cu tur caminda cu tin hende, cualkier momento por surgi un diferencia di opinion.
Ningun hende lo pensa, cu den gobierno mescos cu ta e caso den tur cas di familia, continuamente hende mester brasa otro y recorda otro cuanto nan ta stima otro.
Pero pa un nucleo di hende funciona, no por ta asina cu abiertamente ta enfrenta otro no pa motibo di un punto di principio.
Un coalicion ta existi hustamente pa duna mas fortalesa na e sentido democratico pasobra den un coalicion e deseo di mas cu un grupo di Pueblo ta wordo expresa.
Sigur na 2017, continuamente a bini dilanti na Aruba, cu mester evita cu un solo partido ta haya un forza total den Parlamento despues cu Gabinete Mike Eman a base di un mayoria absoluto, a entrega Aruba debe y mas debe.
Pa un coalicion funciona, mescos cu ta e hecho cu funcionamento di un partido of un corant, diferente opinion mester ta posibel pero tambe e punto di salida kico e Gobierno kier alcansa of kico ta e plan di Gobierno.
Decisionnan democratico den un Gobierno di Pueblo ta nace den mente di un persona, cu ta discuti esaki cu su partido cu ta sostene pa asina e partido por sigui carga tur loke ta wordo dicidi.
Loke wordo discuti den un partido, ta keda den seno di e partido mescos cu tur loke wordo discuti a base di seriedad y respet entre dos persona, ta keda entre nan dos.
Loke wordo discuti den seno di coalicion, mescos cu ta pasa den Hunta di Comisarionan di un compnia, ta keda den seno di coalicion a menos cu ta trata di traicion di e bienestar di e pais.
Esaki ta e forma cu democracia ta funciona den bida diario di politica na interes di Pueblo.
Respeta otro no ta nifica confronta otro of midi forsa. Respeta otro den un coalicion hustamente ta nifica atende abiertamente cu otro pero na nivel.
Cu esaki nos no ta acusa ningun hende pero nos ta splica loke mester evita ora un Pueblo ta cansa di Guera di Ukraine, eleccion na Hulanda, enfermedad cu ta lanta cabez, droga cu ta landa hunto cu pisca den laman.
Cada Ministro tin nan propio responsabilidad pero no mester lubida cu tur grupo tin nan lider cu den e sistema politico conoci na Aruba entre otro, ta wordo eligi na urna electoral.
Si acepta of no acepta, ta keda un hecho cu ora algo bay robes su nomber ta resona pa resto di Gobierno, cu hasta ta carga su nomber den historia politico di un pais.
Na caminda pa ultimo eleccion, Aruba sigur a puntra su mes si e bon trabou cu a evita pa Aruba bay bancarota na fin di 2017, lo a continua.
El a haya continuacion di un team cu ta duna prueba di bon trabou. Un team di Ministronan cu a mustra con union ta duna resultado positivo pa un pais.
Den un situacion mundial, sumamente dificil, Aruba a yega un punto cu mas cu nunca su Gobierno mester ta su ehempel di union, di patriotismo, di Arubianismo cu tin como factor importante cu problema ta wordo atende, manera democracia tambe ta exigi, den consulta cu otro sin midi forsa.
E ehempel grandi tabata e palabranan di e lider cu a inventa Status Aparte. “Si mi muri, coy e bandera y sigui lucha.”
E bandera ta importante!
