ORANJESTAD (AAN) – Manera ta conoci, anualmente riba dia 5 di Juni, ta wordo celebra e Dia Mundial di Medio Ambiente y su tema di enfoke pa 2021 ta: “E Restauracion di e Eco-sistema”.
Pakistan ta fungi awe como anfitrion mundial, tambe den e marco di e lanzamento di “E Decenio di Nacionnan Uni pa e Restauracion di Eco-sistema”.
E restauracion di Ecosystem por tuma diferente forma: planta palo di mata halto, sembra mata den e ciudadnan pa haci nan berde y promove oxigeno natural, haci limpi e rionan y costanan, entre otro.
E Organizacion di Nacionnan Uni ta considera cu e presente generacion ta esun cu por consolida su mes cu e naturaleza.
Generacion Restauracion, re-imagina, recrea, restaura:
“United Nations Develop Program” (UNDP) den un interesante relato ta bisa cu durante demasiado tempo e ser humano a explota y destrui e ecosystem den henter e planeta tera. Cada tres seconde, e mundo ta perde un superficie di boske ekivalente na un campo di futbol y, solamente den e ultimo siglo, mitad di e terenonan humedo a wordo destrui.
50% di e rifnan (coral) a bay perdi y pa 2050, nan lo por disparce te cu 90%, incluso si e calentamento global ta limita su mes na un aumento di 1.5 grado Celsius.
E perdemento di Ecosystem ta priva e mundo di sumideronan di carbon, manera boske y pantano, den un momento cu hende no por sigui permiti su mes esey mas.
E emision global di gas, di efecto invernadero, a aumenta durante tres aña sigui y e planeta ta na un stap di un cambio climatico, potencialmente catastrofico.
E aparicion di Covid-19 tambe a bin mustra con desastroso por resulta, e consecuencianan di e perdida di ecosystem. Door di reduci e area di e habitat natural pa e especienan animal, a crea e condicionnan ideal pa micro-organismonan infeccioso, incluyendo e coronavirus, wordo propaga.
Pa enfrenta e problema grandi aki, e Dia Mundial di Medio Ambiente, ta centraliza su mes den e restauracion mundial di e Ecosystem cu e lema: “Re-imagina, recrea, restaura”.
Restaura un ecosystem ta nifica preveni, detene y reverti e daño. Na lugar di explota e naturaleza nos ta cure.
Pa logra esaki, y precisamente awe, lo ranca e Decenio di e Nacionnan Uni pa e Restauracion di e Eco-sistema (2021-2030). Un mision global pa rebiba miles di miyones di hectarea, desde boske te cu suelo pa cultivo, desde e cima di seronan te e profundidad di lama. Solamente cu variedad di eco-sistema saludable por mehora e medionan di bida di e personanan, contraresta e cambio climatico y detene e colapse di e biodiversidad.
