ORANJESTAD (AAN) – Ta parce cu Crisis Team y DVG, lo mester bolbe duna un repaso tocante e vacuna contra Covid-19,
pasobra tin hende a sinti preocupacion cu e cifranan di casonan nobo, cu tabata 15 Diabierna (12 local) y pasobra e casonan activo a aumenta na 60, no obstante ta hende cu si puntre si el a vacuna ta bisa cu no, cu nan no ta kere den e vacuna.
Ainda tin hende cu ta sigui kere cu ta e virus ta wordo inyecta den e organismo of cu ta bay altera e persona su DNA, of cu ta un experimento, entre otro informacionnan sin sentido cu nan ta scucha aki aya, y cu nan ta kere.
Diabierna atardi, atendiendo un yamada di opinion publico, por a mira con confundi e persona aki ta, pasobra di un banda e ta pensa cu gobierno a suaviza e medidanan demasiado lihe y e mes ta wak den algun lugar di recreacion, cu ta e tereno unda e ta traha, hopi hende banda di otro ta come y bebe, tanto local como turista, logicamente sin tapaboca, pero di otro banda e no ta pro e vacuna pero mas tanto di sigui cu medida, cu distanciamento fisico (loke ta necesario enberdad ainda), mescos cu uza tapaboca y tene man limpi, limpi constantemente.
El a haci un comentario interesante si. Tin hotel unda ya caba mayoria di personal a vacuna, den tur area di trabao, no obligatoriamente, pero pasobra gerencia a percura pa convence nan y hasta a trece un doctor di cas pa splica nan duidelijk tocante e vacuna. Cuanto hotel? Esey no sa, pero posiblemente varios of kizas tur.
No obstante esey, e persona cu a duna su opinion y cu e tin miedo cu e casonan bolbe aumenta mirando cu pronto lo bin eleccion, y cu ya e politiconan ta bay cuminza cu parada, y sigur lo no por evita aglomeracion.
En todo caso, ohala DVG y Crisis Team lo bolbe duna un update pasobra semper ta capta atencion di e comunidad, y alavez pa sigui encurasha esnan cu door di informacionnan incorecto no kier vacuna. Ainda, y faltando poco pa eleccion, no a logra e 85% tan anhela di vacunacion den nos comunidad.
