NEW YORK: E oficina di Derechonan Humano di Nacionnan Uni a expresa Diasabra nan preocupacion pa e aumento di violencia na capital di Haiti,
y a bisa cu 99 persona a muri den recien pelea entre gangnan rival, djis den e distrito di Cite Soleil.
E informe a bira conoci apenas algun ora despues cu Security Council di ONU a aproba unanimamente un resolucion cu ta renoba e mandato di un oficina di Nacionnan Uni na e isla, y a pidi pa tur pais stop di manda armanan chikito, arma liviano, y municion na cualkier persona cu ta apoyando e violencia di gang y actividad criminal.
Agencianan humanitario di ONU a bisa cu nan ta cla pa bay yuda e comunidadnan den conflicto, unavez cu bira mas safe pa haci esey Vocero Jeremy Laurence di UNHCR pa refugiadonan a mustra riba e peligronan aki.
“For di Januari te cu fin di Juni, nos a documenta 934 asesinato, 684 heridos, y 680 secuestro na e capital di Port-au-Prince,” el a bisa. Ademas for di 8 te cu 12 di Juli, por lo menos 234 persona mas a muri of a resulta herida den e violencia relaciona cu gang den e area di Cité Soleil na e capital.
El a bisa cu mayoria di e victimanan no ta directamente envolvi den gang, sino cu nan a wordo ataca door di nan.
Laurence a haci un suplica na e gangnan pa nan stop violencia, y tambe el a insisti na autoridadnan Haitiano pa garantiza cu e derechonan humano fundamental bira prioridad den nan solucion pa e crisis. “E lucha contra inhusticia y e violencia sexual, hunto cu fortalecimento di e vigilancia y denuncia di derechonan humano, mester sigui di ta un prioridad,” el a agrega.
E resolucion di Security Council cu a wordo traha pa Merca y Mexico, a wordo aproba cu voto di 15-0 riba Diabierna. Den esaki ta exigi mesora pa stop cu violencia di gangnan y actividadnan di delincuencia, cu ta un punto cu a wordo destaca doro di China.
Nacionnan Uni ta involucra den Haiti na forma intermitente desde 1990, y nan ultimo mision di mantene paz na e pais tabata di 2004 pa 2017. E mision politico awor ta yudando Gobierno riba stabilidad politico y bon gobernacion.
