Colegio EPI a organiza un anochi pa 43 graduado di sector Economia

ORANJESTAD (AAN)--  E ceremonia di graduacion di Colegio Educacion Profesional Intermedio (EPI), Sector Economia,

a conta e aña aki cu presencia di Minister di Asuntonan Economico, Comunicacion y Desaroyo Sostenible Geoffrey Wever.

   Endy Croes, titular di Enseñanza, a dirigi palabra  di felicitacion na e graduadonan y a expresa di ta sumamente orguyoso pa mira nos hobennan finaliza nan estudio. “Esaki sigur ta e resultado di boso esfuerzo, deseo, disciplina, dedicacion y determinacion. Educacion ta e pilar, base firme y fuerte di nos bida. Educacion ta e yabi di futuro. Awe e graduado ta mira cu tur su esfuerzonan a duna su fruto positivo”, el a expresa.

E Minister ta desea tur graduado cu ta bay drenta mercado laboral y tur graduado cu ta sigui profesionaliza nan mes den un estudio mas avansa, hopi exito. E mandatario a agrega: “Si mi por a duna boso un conseho, probecha awo cu boso ta jong pa boso sigui siña y prepara pa mañan ta ciudadanonan exitoso cu por sigui hiba nos dushi pais pa dilanti”.

Pa finaliza el a gradici staf, personal, docente y mentornan pa nan guia y pasenshi, pa yuda forma 43 profesional. Alaves a felicita e mayornan y famianan cu a duna sosten. “Danki pa kere den boso yiu y sostene nan den nan educacion. Masha pabien na tur graduado, hopi exito!” el a conclui.