Aruba ta experenciando un recuperacion hopi fuerte di su turismo

Minister Dangui Oduber

ORANJESTAD (AAN):  Recientemente Minister di Turismo y Salud Publico sr. Dangui Oduber a ricibi e raportahe di Aruba Tourism Authority pa cu luna di juni. E raportahe aki ta duna un bista cuanto bishitante a yega nos isla den e luna di juni atraves di aeropuerto. Den luna di juni aeropuerto a ricibi 101.696 bishitante y esaki ta un crecemento di 2.6% porciento compara cu juni 2019. E ta mustra cu Aruba ta experenciando un recuperacion hopi fuerte di su turismo.

            Minister Oduber ta señala cu e cifranan di e cantidad di bishitante den luna di juni 2022 a surpasa esun di juni 2019. Es mas esaki ta di 3 luna consecutivo cu e cifranan di aña 2022 ta surpasando esun di 2019 e mandatario ta sigui bisa.

            Minister Oduber ta re capitula cu den luna di april di e aña aki a registra un recuperacion di nos turismo di 108% porciento compara cu april 2019. Tambe ambos luna di mei y juni a registra e mesun cifra di recuperacion cu ta 103% porciento compara cu respectivo lunanan den aña 2019.

            Minister Oduber ta sigui bisa cu e mercado Norte Americano ta keda esun mas grandi y importante pa Aruba. Den juni 2022 Aruba a ricibi 83.943 bishitante compara cu na juni 2019 cu nos a ricibi 79.736 for di Merca y Canada. E mercado Norte Americano a conoce un crecemento di 5.3% porciento cu ta 2 bes mastanto cu e promedio di 2.6 porciento, asina e mandatario a duna di conoce.

            Minister Dangui Oduber ta hopi contento con e recuperacion di nos turismo ta bayendo. E mandatario ta hopi optimista, tambe tin pleno confiansa den tur e partnernan den turismo y tambe den e pueblo trahador cu a demostra di ta hopi resiliente. Turismo ta keda e driver di nos economia.