ORANJESTAD (AAN): E siman aki, e agencia FAO di Nacionnan Uni, a haci un yamada urgente na tur pais di Caribe y Latino America, pa nan tuma medida di prevencion awor cu a detecta casonan di African Swine Flu (malesa di porco) na Republica Dominicana.
Food and Agriculture Organization ta un agencia di Nacionnan Uni, cu a emiti un boletin urgente for di nan sede na Santiago (Chile), unda nan ta mustra cu ta ‘existi un riesgo grandi cu e malesa lo bay plama pa resto di America Latina y Caribe”, y a haci un suplica na e paisnan pa activa y revisa rapidamente nan plannan di contingencia of contesta di emergencia, pa cu e malesa di animal aki.
China tambe a core reacciona pa mustra cu e malesa di porco aki detecta na Republica Dominicana, lo afecta e relacion comercial entre e dos paisnan aki, aunke nan ta satisfecho pa mira cu gobierno di Santo Domingo ta tumando paso pa tene controlnan estricto.
Ta conoci cu ora algo asina pasa, cu procedimentonan internacional ta determina ki medida extra ta bay tuma. Embahada di China na Santo Domingo a bisa cu ainda gobierno Dominicano no a drenta den contacto cu nan, pero si di awor caba China kier demostra hopi solidaridad pa e tipo di caso aki.
Aunke Santo Domingo a bisa cu nan ta tumando tur medida pa purba di isola e criadero di porconan aki na e 11 provincianan unda e malesa a wordo detecta, toch riba Diahuebs a bin critica pisa di e organizacion di Veterinarionan Dominicano, pasobra nan ta reclama cu Gobierno di Santo Domingo a djis ignora nan pa pidi nan cooperacion pa cu e situacion di urgencia aki.
E organizacion di Veterinarionan na Republica Dominicana a lanza critica fuerte pasobra nan tambe tin plan con pa evita cu e virus aki ta sigui plama, pero nan no a ricibi contesta di autoridadnan di agricultura.
Toch nan ta calcula cu e malesa di porco aki lo por causa perdida economico entre 10.000 miyon te cu 30.000 miyon Pesos Dominicano. Y nan ta mustra cu tin suficiente Veterinario y seis scol di formacion, y toch Santo Domingo ta ignorando nan.
Mientras tanto, avionnan cu ta yega Merca e dianan aki, ta hayando extra control di oficialnan di CBP Homeland Security, cu ta controla tur Dominicano y demas pasahero pa wak si acaso nan ta drenta cu productonan di porco, e.o. sausage, beleg, y carni. Tur esaki awor ta prohibi.
Riba diahuebs tambe, Departamento di DVG na Aruba tambe a manda un advertencia pa esnan cu ta viahando pa Haiti of Republica Dominicana, pa nan ta sigur di no ta trece productonan di porco ora di regresa di nan vacacion.
PANICO DI COMPRA: Aunke a divulga cu e African Swine Flu aki no ta causa daño na hende, toch poblacion Dominicano e siman aki a dicidi pa cumpra galiña pa come y keda leu di carni di porco. Esaki dado momento a pone cu awor ta galiña ta scars den Supermarketnan na e pais di merengue.
Algun Supermarket a dicidi e siman aki caba pa pone un maximo cu cada cliente por cumpra di galiña. Pues tres paki maximo di chicken wings, of 3 maximo di pia di galiña. Y pa colmo prijsnan a subi bay sky-high tambe den un solo siman.
Y e cantidad di galiña cu ta wordo manda na Supermarketnan ta e mesun hopi di semper, pero toch tin scarcedad. E demanda di consumidornan a subi di forma extraordinario e siman aki.
Informacion nobo ta indica cu e agencianan a dicidi na pidi extra galiña pa wordo importa den simannan venidero, pa asina por cumpli cu e demanda inespera di galiña.
Semper tabata asina cu galiña ta e proteina mas bendi na mercado Dominicano, cu ta como 50% di consumo. Carni di porco tabata semper na como 30%. Pero awor debi na e malesa di porco, e consumo di galiña a subi na casi 80%.
EHERCITO TAMBE: Mientras tanto Gobierno di Santo Domingo a crea un Comision den cual tambe a envolvi Ehercito di Republica Dominicana, y e Centro di Operacion di Emergencia pa bay eradica e malesa di porco na e pais.
Ministro di Agricultura Limber Cruz a presenta e plan oficial di e Comision aki.
Nan a caba di haya di Gobierno Mericano tambe algun equipo high-tech cu ta yuda nan permiti detecta e malesa aki mas rapido cerca cada porco. A tuma decision cu lo bay sacrifica e porconan contagia cu e virus, y via di Banco Agricola lo bay duna un suma di placa na e productornan cu ta perde e porco ey.
Ta for di fin di siman cu a pasa, cu a bin haya sa cu e porconan na Republica Dominicana a wordo contagia cu e African Swine Flu aki.
