ORANJESTAD (AAN): E medidanan cu ta drenta na vigor entrante awe diasabra 7 di Augustus den cuadro di e maneho di Covid ta conta pa casino tambe.
E casinonan lo tin cu cera tambe 12 am, asina Prome Minister Evelyn Wever-Croes a duna di conoce.
Esaki ta algo lamentabel toch ya cu e ta afecta turismo na momento cu Aruba ta hayando hopi turista. Pero esaki ta e motibo pakico a pospone e medida aki pa basta tempo.
Hopi hende tabata pidi pa bin cu medida for di basta tempo caba, pero tur dia tabata pone den balans y tabata mira e desaroyo economico como turistico y laboral.
Prome Minister a enfatisa cu no por a warda mas y pesey e decision aki di orario di ciere mester a cay.
El a enfatisa cu ohala por logra domina e situacion di Covid y cu algun dia ta bolbe yama un rueda di prensa pa bisa cu ta flexibilisa y cu tin mas ora habri pa e casinonan.
