*Un djis un hende no lo por viaha pasobra e no ta vacuna - ORANJESTAD (AAN): Prome Minister Evelyn Wever-Croes a duna di conoce cu segun e leynan existente na Aruba
no por prohibi un hende no vacuna no drenta un establecimento, un restaurant of un nightclub.
Pero el a remarca cu un establecimento si por bin cu su propio reglanan.
El a bisa cu e tabata tin contacto caba cu establecimentonan y nan ta considerando pa bin cu cierto di e rekisitonan aki. El a pone como ehempel, ora cu un hende tin un fiesta na su cas, e persona ey por dicidi ken ta invita y laga drenta. Y pa por proteha esnan cu e ta stima, e por pone como condicion cu solamente esnan vacuna ta drenta.
E mandatario a sigui bisa cu esaki ta exigencianan cu por bin pero nan no por wordo imponi door di gobierno. Otro paisnan por a wak cu a hacie, manera Merca, unda mayoria di e estadonan grandi a bin cu e condicion aki caba, esta cu si bo ta vacuna bo por drenta.
Aki na Aruba ainda no por bay asina leu y no sa si lo yega asina leu, specialmente mirando cu e establecimentonan mes por bin cu e tipo di condicionnan aki, a bisa.
E grado di vacunacion na henter mundo ta relativamente abao y esey ta pone cu ta bay tin mas variante tanten cu henter mundo no ta vacuna. "Esey kiermen cu nos ta bay tin mas di e momentonan aki cu nos ta bay topa na caminda y ta bay yega un momento cu esnan cu pa escogencia no ta vacuna ta bay tin menos opcion y esey no necesariamente pasobra ami ta bisa of pasobra gobierno ta haci, pero esey ta manera henter mundo ta bay ta", Wever-Croes a expresa.
El a agrega cu un djis un hende no lo por viaha si e no ta vacuna y tin varios cos cu bo no lo por haci si bo no ta vacuna. Semper lo tin un grupo di hende cu no por haya e vacuna pa motivonan di salud of otro cos, pero tin ainda un grupo grandi di hende na Aruba (65% di e poblacion na Aruba ta vacuna) cu ta un 35 % cu no a vacuna ainda y banda di esaki no tin hopi hoben vacuna, a enfatisa.
"E berdad ta cu ta bay bira mas dificil pa esnan cu no kier vacuna, pero cu nos ta bay bin cu reglanan awo, no, esey no ta bay pasa na e momentonan aki", Evelyn Wever-Croes a duna di conoce.
