MARACAY: Un homber kende recien a sali di prison despues di a sinta su sentencia di a viola varios mucha sexualmente den area di Las Tejerías na estado Aragua (Venezuela), a wordo mata pa hendenan no-identifica.
Den oranan di anochi riba e caretera Panamericano, nan a ataca e homber y a mutila un braza y a tira riba su cabez cu un scopet y pistol. Ta parce cu e matamento aki a ser haci pa gruponan di delincuente cu ta opera den municipio Santos Michelena na parti pariba di estado Aragua, kendenan a dicidi pa tuma husticia den nan mesun man, ora cu nan a haya sa cu e homber aki a abusa varios mucha menor di edad na La Tejerías.
Habitantenan di e area di La Pradera a bisa cu berdad den oranan di anochi nan a tende tiro di diferente tipo di arma di candela, y ora cu solo a sali y cu nan a sali riba caya, nan a bin haya e cadaver di e homber, kende tabata bisti cu un short blauw, cu su brazanan tur mutila. E no tabatin cara y su curpa tabatin varios buraco di bala di diferente caliber, mustrando cu nan a tira riba dje na cantidad.
Polis no a informa prensa e nomber di e homber cu apenas algun dia a sali di e prison conoci como Tocorón. Pero si e asesinonan a bay laga un carton atras cu e mensahe: “Esto te pasó por sádico”.
Riba e potret por mira momento cu funcionarionan di Cicpc ta colectando evidencia di e caso.
