ORANJESTAD (AAN): Tabata aña pasa, riba Diasabra 22 di augustus 2020 cu e isla di Aruba a worde sacudi pa un noticia den prensa tocante lekmento door di DVG
(Departamento di Salubridad Publico) di informacion confidencial di nomber di pashentnan contagia cu Covid-19.
Riba Whatsapp un lista tabata circulando di pashentnan cu a worde getest positivo pa Covid-19. Director di DVG a haci denuncia riba 24 di augustus 2020 di violacion di secreto profesional (ambtsgeheim).
Aunke a tene cuenta desde prome momento cu un eror humano lo por a worde cometi, Cuerpo Policial di Aruba a start un investigacion bao guia di Fiscal di Husticia. Esaki pa haya sa si a lek informacion confidencial y ken a lek y si tabata intencionalmente of no.
Den e investigacion a scucha 2 persona como sospechoso y 8 persona como testigo. E investigacion a keda cla na luna di Mei ultimo y entrega na Ministerio Publico.
E investigacion a mustra cu un di e sospechosonan a berdad manda informacion confidencial pa un e-mail robez. Esaki a bay accidentalmente.
E acto aki, esta e ekivocacion, no ta hiba na sospecho di un hecho castigable, manera ta para describi den articulo 2:232 di Codigo Penal (Wetboek van Strafrecht). No por papia di intencion. E caso a bira un sepot.
Un di dos persona cu a worde considera un sospechoso, a resulta di a worde incorectamente marca como sospechoso. E caso aki tambe a bira un sepot.
