Na un manera dibertido y special, scoutnan a pasa over pa e siguiente grupo

Edmira Christiaans di Grupo Scout Ora Ubao Aruba:

ORANJESTAD (AAN): Grupo Scout Ora Ubao Aruba ta para firme riba e principionan fundamental di Scouting: forma hoben cu caracter, responsabilidad y cu boluntad pa brinda servicio na comunidad. Mision di Grupo Scout Ora Ubao ta  pa desaroya lidernan cu integridad, disciplina y amor pa comunidad. Nan vision ta pa crea ciudadanonan consciente, fuerte y comprometi cu un futuro miho pa Aruba. 

Despues di un algun siman di break, diasabra 28 di februari a tuma luga e prome encuentro di Grupo Scout Ora Ubao. Esaki tabata un encuentro unico cu a tuma luga na Mangel Halto na unda cu tabata tin e ‘Overzwemmen, Overvliegen y Overstappen’ di e scouts. 

Den entrevista cu DIARIO, Lider di Scout señora Edmira Christiaans a splica cu e Bevernan di mas grandi a pasa pa e grupo di Welp, (Horde), e Welpnan di mas grandi a pasa over pa Verkenners y e Verkennernan di mas grandi a pasa over pa e Grupo Explorers. 

E cambio pa grupo a bay den un manera hopi dibertido y special pa e muchanan. E scoutnan mester a pasa den diferente obstaculo cu tawata mara na e area di crecemento di cada mucha. Esaki, señora Christiaans a remarca, ta e manera pa yama bonbini na e muchanan cu a bay un stap mas den e siguiente grupo di scout. 

Señora Christiaans a expresa cu Grupo Scout Ora Ubao Aruba ta sigui traha den e area di crecemento di e muchanan y ta sigui comprometi na inverti den nos muchanan y hobennan como e lidernan di mañan. Invitacion ta bay na mayornan, boluntarionan y comunidad en general pa sostene e mision di Scouting. Hunto nos por forma caracter, stimula liderazgo y crea un generacion cu ta sirbi cu orguyo, disciplina y dedicacion. 

Grupo Scout Ora Ubao tin diferente seccion segun edad entre 2 pa 21 aña. Na mayornan cu ta desea pa nan yiunan bira miembro di Grupo Scout Ora Ubao, por contacta nan via nan pagina di Facebook.