Na St. Eustatius ya caba pueblo no kier ta forma parti mas di Reino Hulandes

Clyde van Putten di Partido PLP:

ORANJESTAD (AAN): Un di esnan cu delegacion di Islanan BES cu a bin Aruba, esta Clyde van Putten di Progressive Labor Party di St. Eustatius, a indica cu nan a bin Aruba pa pidi sosten di e isla den proximo reunion di IPKO, pa hala atencion encuanto loke ta pasando na e islanan BES.

   Ta asina cu hunto por manda un mihor mensahe cla y raspa pa Den Haag riba loke Gobierno Hulandes ta haciendo, cu no ta mantene su mes na acuerdonan cu tin, y ta tratando di pusha un cambio di Rijkswetnan WOLBES y FINBES riba nan schouder, y tambe cambionan cu lo pone haya un mas autoridad riba e Conseho Ehecutivo di e islanan mes.

   Na Aruba a djis bin busca sosten, mescos cu ta haciendo na Curaçao y St. Maarten.  Pasobra debi cu Bonaire su Parlamento mes no ta den IPKO, nan ta spera cu e miembronan di Curaçao, St. Maarten y Aruba por yuda manda e mensahe pa nan.

   Ademas di tur esey, por a nota cu habitantenan di e isla di St. Eustatius ta nada contento di e forma cu nan ta wordo maneha door di e Hulandesnan.

   Aki Van Putten a splica, cu a tene diferente referendum caba na St. Eustatius, y poblacion di e isla a manda un mensahe bon cla, esta cu nan no kier forma parti mas di Reino Hulandes.  Pues nan tin asina hopi mal experiencia bao di Islanan BES, cu cueste loke cueste nan kier bula afo.

   Pueblo di St. Eustatius tin un opinion skerpi riba e asunto aki.  Pasobra te cu awor nan ta mira cu Den Haag ta djis yega y trapa riba e derecho di cada ciudadano, sin respeta nan derechonan.  Pa esaki y hopi mas, nan ta pidiendo sosten di e Parlamentarionan di Aruba, Curaçao, y St. Maarten.

   Na Aruba, a bin haya e sosten di fraccion di Partido MEP, y fraccion di Partido PPA.  Pero ni di AVP, ni di Futuro no kier a firma.