ORANJESTAD (AAN): Durante henter luna di September, Fundacion Pa Nos Muchanan (FPNM) a ofrece un biaha mas e programa di Stima bo yiu, Guia bo yiu (Stima Mi, Guia Mi).
E programa a enfoca riba Modulo 3 cual ta pa mayornan cu yiu entre 2.5 aña – 4 aña. 14 mayor a participa hunto cu nan yiunan, cual 7 ta mama y 7 ta tata.
‘Stima Mi, Guia Mi’ ta un programa educativo pa mayor hunto cu nan yiu, unda ta enfoca riba mehoracion di e laso entre e mayor y su yiu y alabes cultiva e desaroyo optimal di e yiu.
E necesidad pa e programa aki a sali for di e “Community Survey” cu Kiwanis Club of Palm Beach a conduci durante e aña 2018 y 2019. Den esaki a señala cu hopi mayor lo aprecia mas guia riba nan tarea den formacion positivo di e yiu durante e prome añanan di bida. E programa aki a inicia na 2021 door di Kiwanis Palm Beach y ta un colaboracion entre Kiwanis Palm Beach, Fundacion Pa Nos Muchanan, Tienda di Educacion, Fundacion Respeta Mi, Centro pa Hoben y Famia y Stichting Wit Gele Kruis. E programa ta consisti di tres modulo. E prome modulo ta pa mayor cu baby recien naci te 12 luna, modulo 2 ta pa mayornan cu yiu entre 1 aña - 2.5 aña, y modulo 3 ta pa mayornan cu yiu entre 2.5 aña - 4 aña di edad.
Riba 23 di Augustus 2022, e programa di Stima Mi, Guia Mi a wordo traspasa pa Fundacion Pa Nos Muchanan. Desde e traspaso oficial, FPNM a sigui organisa varios sesionan pa mayornan y nan yiunan.
E programa cu a cab'i finalisa riba 28 di September 2023, a consisti di 6 sesion unda nan a ricibi diferente tayer di parti Fundacion Pa Nos Muchanan, Fundacion Respeta mi, Centro pa Hoben y Famia, y Tienda di Educacion.
E mayornan a participa hunto cu nan yiu, na unda nan a toca e siguiente temanan: E importancia di e prome añanan; Introduccion di Mayor Sensitivo y Responsivo; E relacion entre mayor y yiu; E importancia di Desaroyo Social-Emocional; Limite y Disciplina Sensitivo y Responsivo; y Hungamento pa stimula e areanan di desaroyo.
E encuentronan tawata yena cu informacion y tambe actividadnan interactivo. E muchanan a pasa un rato dibertido hungando cu otro bou guia di dos trahador pedagogico, mientras e mayornan tawata tin e oportunidad di ricibi informacion y comparti nan experiencia cu otro. Despues di esaki a sigui e momento pa e mayornan pone locual nan siña den practica cu nan yiu, bou guia di e facilitador di e encuentro.
Ta felicita tur e participantenan y alabes gradici Kiwanis Club of Palm Beach, Tienda di Educacion, Fundacion Respeta Mi, Stichting Wit Gele Kruis y Centro pa Hoben y Famia pa nan sosten durante e ultimo simannan. Mayornan di muchanan entre 0 pa 4 aña, keda pendiente pa e siguiente tanda di Stima Mi Guia Mi.
