DIMP a prolonga fecha pa Aangiftebiljet
ORANJESTAD (AAN): E famoso envelopnan a sali pa tur hende rond di Aruba, y e fecha poni riba nan ta di 2 Augustus 2022. Segun ley, tur hende ta haya 2 luna di tempo pa acumula tur documento, yena e formulario, saca fotocopia, y entrega nan bek prome cu e deadline cu ta Dialuna 3 di October 2022.
Meverly Romano di Departamento di DIMP durante un conferencia di prensa teni Diahuebs mainta na Oficina di Impuesto, a indica cu nan a tuma decision pa duna un extension di e fecha aki cu 2 luna mas.
E fecha absoluto awor a bira Dialuna 5 di December 2022, y tur hende ta haya e extension aki automaticamente! Bo no mester manda ningun carta ni haci peticion pa e prolongacion aki.
Esey sinembargo lo bay bira e deadline nobo y lo no haci ningun prolongacion mas. Si acaso abo no a logra haya (ainda) bo Aangiftebiljet, bo por pidi un duplicado via email na This email address is being protected from spambots. You need JavaScript enabled to view it.
Corda cu si bo keda sin entrega e Aangiftebiljet aki, lo pone cu despues lo bo haya un cobranza taxativo basa riba un calculo di entrada haci door di Inspector di Impuesto, y lo inclui tambe un boet cu ta 5% di e suma di belasting, cu ta minimo 250 Florin y maximo di 10.000 Florin.
Bo mester yena e Aangiftebiljet aki hasta si acaso bo no tabatin entrada durante 2021. Kiermeen den un caso asina, e ciudadano ta pone un declaracion con el a cubri su gastonan durante aña, firma e formulario y entregu’e. Asina bo ta evita un boet tambe.
DIMP a bisa cu nan ta finalizando data di 2020, y tin 40.000 Aangiftebiljet cu ta wordo procesa, y falta 9.900 ainda pa keda cla cu data. Nan ta spera cu pa fin di September lo keda full cla cu aña 2020.
Esey lo bira un momento historico cu pa prome biaha Departamento di Impuesto ta keda cla cu procesa impuesto di e aña anterior.
Pues ya entrante otro luna, esta October 2022, nan lo bay cuminza procesa Aangiftebiljetnan cu a drenta caba awor pa Inkomstenbelasting 2021. Kizas prome cu December ya caba lo tin hende hayando placa bek pa aña di impuesto 2021.
