E importancia di trabao boluntario

ORANJESTAD (AAN): Un boluntario ta un persona hopi special, ta trata di un hende cu sa pone necesidad di otronan of di un causa,

prome cu su mes. Den un mundo cu ta birando cada biaha mas individualista y cu hopi hende ta traha pa nan mesun beneficio, ta sumamente importante pa promove solidaridad, bon boluntad y empatia.

Trabao boluntario ta asina primordial cu dia 5 di December a wordo decreta Dia Internacional di Boluntarionan, pa Asamblea General di Nacionnan Uni.

Kico ta un boluntario?

Un boluntario ta un persona cu riba su mes ta dedica parti di su tempo na yuda otro, of cierto instancianan cu ta yuda esnan den mas necesidad, sin haya pago of beneficio. Nan motivacion principal ta e acto di yuda un prohimo.

Un boluntario por ta un profesional cu por yuda cu aspectonan specifico na nan trabao, por ehempel, un chef por cushina pa un shelter, un accountant por yuda den maneho di un fundacion, pero tambe por ta un studiante, cu por yuda pa haya experiencia den nan field, of un pensionado pa sigui keda activo den comunidad. Cualkier persona por bira un boluntario.

Trabao boluntario tambe tin e aspecto social, na unda bo ta siña conoce mas hende, ta mas social, mas activo den comunidad. Mester menciona cu e acto di yuda un hende tambe ta algo spiritual, yen di empatia y amor pa otro ser humano of pa medio ambiente. Bo por haya un bista mas positivo di bo mesun bida, door di no keha tanto riba cosnan chikito of cu no ta canando manera bo kier. E por duna bo un perspectiva mas amplio di mundo rond di bo. 

Hospice Atardi ta buscando boluntarionan pa nan huespednan. Specialmente e boluntarionan cu ta gusta traha cu hende y por duna un persona un trato adecua y personal den nan ultimo fase di nan bida.

Nan ta invita cualkier persona interesa pa participa den nan Dia di Introduccion, cu lo tuma lugar diasabra 17 di September, pa 8'or di mainta te cu 1'or di atardi, na Hospice Atardi, situa na NCC 147. Por yama nan pa mas informacion na 584-0085 of 594-8508.

Aporta bo tempo na trabao boluntario y contribui pa mehora nos comunidad.