Parlamentario Alvin Molina:
ORANJESTAD (AAN) – Den conferencia di prensa, Parlamentario Alvin Molina di fraccion di MEP, a elabora tocante Carnival Village y con su situacion actual ta.
Molina a bisa cu riba su mes Carnival Village ta un bunita proyecto, pero e falta hopi pa e por bira un exito completo.
El a bisa cu comerciantenan a inverti masha hopi pa haci di esaki un lugar hopi agradable, y hopi hende local di diferente parti di Aruba, y tambe turistanan tabata sa di bishita Carnival Village.
No obstante, na e momentonan aki varios kiosco ta cera, y pa basta tempo caba no tin mucho actividad mas. Antes por a mira den fin di siman gruponan ta toca, tabata tin ambiente y hendenan tabata socializa cu otro, pero pa basta tempo caba esaki no ta sosode.
“A bira cla e deseo pa uso di Carnival Village ta mucho mas cu solamente pa carnaval. E grandura y e infrastructura cu ta disponible ta duna oportunidad pa varios actividad. Mi mes a entrega varios mocion cu tin di haber cu Carnival Village, di loke ta wordo rekeri pa e desaroyo di Carnival Village. Si nos por use pa varios actividad cultural di enseñanza, deporte, recreacion, musical, conciertonan, lo yuda reforza e economia di San Nicolas y di Aruba, ademas di turismo. Antes, hopi turista tabata frecuenta Carnival Village”, e parlamentario a subraya.
El a menciona cu pesey, el a presenta un mocion pa construi un stage fiho, pasobra cada vez cu mester a pone un stage eynan, e tabata costa 100 mil florin, pa cualkier comerciante of hende cu kier a organiza un evento, y esey ta hopi placa.
Molina a bisa cu e ta contento cu Minister Presidente a anuncia tambe cu construi un stage fiho ta un di e siguiente plannan.
Segun e parlamentario comerciante y organizadornan no ta logra haya permiso pa organiza actividadnan na Carnival Village. E motibo cu ta wordo duna door di DIP ta cu e actividadnan cu ta pidi permiso pe, no ta pas den e plan cu tin pa Carnival Village.
“Un plan cu ni e comerciantenan tin den nan posicion, y mi a purba di haya directo for di DIP, pero mi no a haya esey. Pero e mesun plan aki ta wordo uza pa nenga e desaroyo; anto esaki ta e resultado: un luga bashi, abandona, kiosconan cera”, e parlamentario a expresa.
Molina a sigui splica cu el a tuma contacto cu Minister di Infrastructura y Minister Presidente, pa e por intermedia cu DIP pa e por ricibi e bestemmings plan aki. E kier sa kico ta e plan original di Carnival Village. “Basa riba loke tin den e plan aki, nos por evalua si y con, nos por logra un adaptacion den e plan aki, cu si ta bira posible pa haci uso mas amplio di e infrastructura bunita aki”, e parlamentario a subraya.
