Diadomingo 8 oktober nos a ricibi e noticia tristo cu un baluarte, un campañador y luchador grandi pa nos prestigioso partido MEP, esta sr. Geronimo (Chomon) Croes dfm a bay laga nos.
Desde mi infancia mi a conoce Chomon, unda e tempo aya hopi di e muchanan di Ayo y vecindario tabata bay scol y misa di Santa Cruz na pia. Asina nos tabata topa otro den mi infancia. Mas despues cu Chomon a casa y a construi su cas na Siribana hopi cerca di unda ami tambe a biba, esta Siribana, a nace un amistad. Asina nos a conoce otro y a crece un amistad y aprecio pa otro.
Desde 4 di maart 1975 mi a subi lista di MEP y desde e prome vez caba den politica Chomon cu su señora Maria a bira activo y tabata yuda nos den tur actividad y particularmente durante campaña, unda fuera di bishita hende y organisa e dia di eleccion, semper e tabata tey pa nos partido. Mi ta corda nos urna di bario na Kadushi Largo, unda tanto Chomon como Maria tabata yuda nos. Nos a forma un grupo cu tabata bishita e bario aki cas pa cas. Nos tabata conoce e bario completamente. Asina nos a haya sosten increibel grandi di henter e bario y e sosten tabata masal.
Asina durante e añanan mi tabata riba lista di MEP, 7 vez como candidato y 7 vez como lider desde eleccion di 6 di januari 1989. Nos a skirbi asina historia politico, unda cu nos tabata haya masha hopi voto mes pa nos partido MEP.
Mi ta corda ainda e prome eleccion cu mi a bay como lider, esta 6 di januari 1989. MEP a haya 777 voto na Kadushi Largo, cu tabata mas cu cu ¾ di henter e electorado na e urna ey. Despues nos tabatin eleccionnan manera 28/9/2001, nos a haya ey 849 voto, 23/9/2005, 773 voto y 25/9/2009, 681 voto. No mester lubida cu e cantidad di hendenan cu por vota ey tabata 1000 y pico. Nos a concentra den e bario cu mi a nace y crece, unda den e eleccion di 8/1/93 como lider na e urna ey so mi a haya 375 voto, 28/9/2001, 298 voto, 23/92005, 366 voto y na e ultimo eleccion cu mi a participa 25/9/2009 mi a haya 318 voto cu ta recordnan den historia politico di nos isla.
Locual mi kier ilustra ta e trabaonan di Chomon dfm y Maria. Hunto cu un grupo relativamente chikito nos a logra e hazaña y exito grandi aki. Chomon y Maria tabata para semper cla pa yuda MEP y mi persona den tur actividad y campaña. Su honestidad, lealtad tabata hopi grandi. E tabata tin un simpatia grandi pa nos. E tabata gusta pa tin respet pa otro y bo por a conta cu su cooperacion den tur cos. Na tur momento para cla pa yuda.
Chomon, bo tabata parti di momentonan grandi y historico di nos partido MEP.
Danki pa semper a yuda nos y cu nos Creador duna bo un bon lugar di sosiego den su Reino celestial.
Nos partido y mi famia ta hopi gradicido pa tur locual bo a haci y nifica pa nos. Como boluntario bo a duna bo contribucion na engradece nos partido y yuda mi como candidato y lider.
Na su 2 yiunan, ir. Roland y dr. Haime, boso por ta orguyoso di tabatatin un tata asina dedica na su famia y a percura pa boso riba tereno educativo por a forma boso mes como ciudadanonan bon prepara y para cla pa yuda nos pais progresa. Boso tata ta orguyoso di boso.
Na Maria y henter famia, condolencia y hopi forsa den e momentonan mas dificil den bida. Cu Dios duna boso hopi forza y sosten.
Chomon, danki pa tur cos y sosega den e Reino Celestial.
Lider honorario di MEP,
Nelson Orlando Oduber
