Partido Movimento Electoral Di Pueblo MEP a despedi di un gran baluarte
ORANJESTAD (AAN): Dialuna mainta, na Cede di Partido Movimiento Electoral di Pueblo, MEP, compaña pa famianan y amigonan, a rindi un ultimo homenahe na señor Harry Croes.
Un multitud grandi a yega Cede di MEP pa duna danki na nos Baluarte cu a stima su pueblo y cu pueblo ta stima. Un Cede di MEP dialuna mainta na unda un multitud grandi a yega pa uni cu famianan di Harry Croes, cu e gran famia di MEP, cu su amigonan di mesa di domino, cu candidatonan cu ta riba lista awor y esunnan cu tabata riba lista, pa asina bisa un danki grandi na e bon Arubiano Harry Croes. Danki Harry, pa e legado cu bo a laga pa tur Arubiano cu ta stima nos dushi Aruba manera abo a stima nos pais.
E ceremonia a tuma luga dilanti e bandera di Aruba di mas grandi di Aruba, cu tabata un iniciativa di Harry, pa MEP tin e bandera di Aruba di mas grandi, y pa nos ta e prome cu semper lo hisa e bandera di Aruba e anochi di 17 pa 18 di Maart di tur aña, un tradicion cu Harry a cuminsa cu ne y cu Partido MEP lo mantene pa nos futuro generacionnan.
Durante e ceremonia aki, Lider di partido MEP Evelyn Wever-Croes a duna un discurso, gradiciendo e famianan pa e oportunidad cu nan a duna e famia di MEP pa rindi e ultimo homenahe aki. Harry Croes tabata un baluarte hopi importante pa Partido MEP. Harry a lucha shouder cu schouder cu tur e lidernan di partido incondicionalmente y tawata cu nos Partido desde su fundacion. Harry tabata consehero tambe di tur 3 lider di MEP, di Betico, di Nel, y di Evelyn Wever-Croes y tur 3 lider semper por a conta riba Harry su consehonan. “Cu bo ta di acuerdo cu Harry of no, na fin di dia bo ta keda di acuerdo cu Harry, pasobra Harry ta mas MEP cu nos tur hunto”, tawata palabranan cu semper Harry tawata expresa.
Harry tabata tin un impacto hopi grandi, no solamente pa nos partido y e himno di Aruba, sino tambe riba e lucha pa nos status aparte. Harry a biba e situacion di Augustus Scur y semper tawata conta di detayenan di e temporada aki.
Harry semper a admiti cu el a haya hopi oportunidad di bida. Tempo e tawata hoben, e tabata poco rebelde, y Harry a enfatisa semper cu su casa Ligia a scapa su bida pasobra señora Ligia ta stim’e y tin pasenshi cu ne. Esaki, segun Harry a menciona, tawata e caso durante Augustus Scur tambe.
“Danki señora Ligia, danki na yiunan di Harry y tur otro famia, pa comparti e gran baluarte aki cu nos. Un bon Arubiano cu tabata tin un amor enormemente grandi pa Aruba, pa su himno y bandera, cu tabata kier a inculca e amor ey den tur hende. Cada biaha cu e bandera ey bay laira 17 pa 18 di Maart mei anochi, keto bay mi ta haya kippenvel.
Ohala awe nos por reconfirma nos compromiso. Cu tur loke Harry a haci pa Aruba, cu nos ta sigui carg’e y nos ta pas’e pa nos yiunan y nan yiunan. Nan ta bisa cu ora un hende fayece e no a muri si nan keda recorde, si bo lubide, e ta muri. Awe mi kier pa nos tur akinan, reconfirma nos compromiso pa nunca lubida Harry.
Famianan di Harry, bosonan por ta hopi orguyoso di e gran persona cu Harry tabata na bida. Tur hende tin un co’y bisa, nos tur ta haci cosnan cu tin biaha otro no ta gusta, pero Harry tabata un shon di hende, y ohala Papa Dios tin un bunita luga p’e y cu papa Dios duna boso hopi forsa, pa poco poco e dolor por bira alegria cu tur e recuerdonan bunita di dje. Nos lo recorda Harry semper, pasobra Harry ta un baluarte di Movimento Electoral di Pueblo”, Lider di MEP a expresa den nomber di Partido MEP.
