Solange Tchong, vocero di AZV:
ORANJESTAD (AAN) Na Final di e aña en curso, 2025, tur zorgpas di AZV lo caduca y e instancia lo no entrega mas carchi, pasobra aworaki tur cos ta bay digital.
Manera ta conoci, ya cu tin hopi hende a haci e cambio caba, bo AZV zorgpas lo ta riba App di bo smartphone. Asina, e Relacionista Publico di AZV, señora Solange Tchong a informa.
“E t’asina cu desde 2019, cu nos a cuminza cu e aplicacion AZV App, nos por bisa cu nos ta hopi contento cu esaki. El a crece y sigur e ultimo aña hopi mas; nos tin aworaki 97 mil usuario di AZV App y esaki ta hopi bentahoso pa e asegurado pasobra e por proba e ora ey, cu e ta cliente di AZV na cada loket di servicio medico. Otro bentaha cu tin tambe ta cu si bo ta pone e boton di notificacion ora cu tin informacion importante di AZV, nos ta notifica e clientenan”, Solange Tchong a indica.
Como ehemplo, el a bisa cu ora ta periodo cu e asegurado por haci cambio di docter di cas of di botica, nos ta recorda e clientenan riba esaki.
Otro aspecto cu señora Tchong kier a bisa ta, cu e aña aki hopi di nan zorgpas di plastic ta bay caduca, pues tene cuenta cu AZV no ta bay renoba esakinan mas.
“Nos no ta bay duna un carnet mas, y esaki ta conta principalmente pa nos grupo di adulto mayor, cu kizas ainda no tin e AZV App, kizas pasobra nan no tin un smartphone. Pero t’asina cu tin dos opcion, bo por, por ehemplo, laga un yiu of un sobrino cu por, agrega bo AZV App na su telefon. Si t’asina manda nos un email pa nos duna nos aprobacion pa esaki por sosode. Of, si e persona ta bisa no, ‘ami ta un adulto mayor y mi no tin un smartphone, pero mi no kier tampoco cumpra uno pa tal motibo’, ningun problema cu esaki” Solange a menciona, y a splica kico ta e caminda pa cana den e caso aki.
