Misa na Parokia Birgen di Fatima na honor di Dr. José Gregorio Hernández y Soeur Carmen Rendiles

Señora Olga Marin:

• E prome Santonan Venezolano hopi venera na Aruba tambe 

ORANJESTAD (AAN): Durante un ceremonia historico y emotivo na Plaza San Pedro Diadomingo ultimo, dilanti di miles di fiel cu tabata presente, Papa Leo XIV a eleva na santidad e Venezolanonan Dr. José Gregorio Hernández y Soeur Carmen Rendiles. Nan a bira e prome santonan di Venezuela. Durante e mesun ceremonia, cinco otro beato tambe a wordo canonisa.

   Dr. José Gregorio Hernández ta un ‘Santo pa tur’. E tabata un medico Venezolano di gran fe y bon curason, cu a dedica su bida na yuda hende pober gratuitamente. Despues di su fayecemento tragico, su legado spiritual a crece internacionalmente. Na Aruba tin dos kapel di Dr. José Gregorio Hernández

   Soeur Carmen Rendiles, a consagra su bida na Dios y a sirbi humildemente. E tabata e Fundadora di e congregacion “Siervas de Jesús,” y tabata conoci pa su bondad, liderazgo spiritual y pa su entrega total. Su fe firme y amor pa Dios a inspira hopi venezolano.

   Diadomingo a tene un misa solemne na Parokia Birgen di Fatima na Dakota na honor di e santonan aki na unda cu un grupo grandi di deboto, especialmente venezolano, a bin hunto pa honra y gradici e dos santonan Venezolano.

   Señora Olga Marin, Coordinadora, a expresa cu esaki ta un dia grandioso tanto pa e pueblo di Venezuela pero pa mundo henter. El a agrega cu residentenan Venezolano na Aruba tambe ta hopi orguyoso y emociona di por conta awo cu e prome dos santonan Venezolano. E pueblo di Venezuela pa hopi aña a spera cu Dr. José Gregorio Hernández lo wordo eleva na santidad. Y awo, e deseo aki a bira realidad.

   Señora Marin a expresa cu awo, a travez di e santonan aki, e pueblo catolico por ta mas cerca di Dios y por spera milagernan mas grandi. Segun señora Marin, e anhelo y speransa di e pueblo Venezolano ta cu awo nan oracionnan lo wordo contesta, nan pais lo cambia y un di e prome milagernan cu mas nan ta anhela ta e libertad di Venezuela y harmonia y hermandad lo reestablece y famianan por reencontra. Y Venezuela lo sigui ta e paraiso cu semper tawata dispuesto pa comparti, especialmente cu e isla di Aruba, pa cua venezolanonan cu ta biba aki, ta hopi agradeci.