*Tin box den diferente localidad unda por aporta cu granito di arena
ORANJESTAD (AAN) – Gianaika van der Biezen, directora di Fundacion pa Nos Comunidad, den entrevista cu DIARIO a indica cu semper nan tin nan boxnan, den diferente localidad, pa pueblo yuda contribui cu e fundacion, pa e por yuda su clientenan.
El a expresa cu tur granito por yuda sea pa cuminda, pa apoyo y sosten, pero principalmente pa engrandece e pakete di comestible cu productonan duradero.
Gianaika a splica cu pa comestible e fundacion tin 350 famia y tin biaha tin cu conta, cada constelacion por consisti di un pa dos, tres pa cuater, cinco y mas persona, anto a base di con grandi e famia ta, tin cu duplica e suma.
“Si mester wak e prijs di cada pakete nos por uza minimal 250 fls pa 1-2; 350 fls pa 3-4 persona, anto 450 fls pa 4-5 (plus) persona. Kiermen, pa luna mes bo ta sinta riba un suma halto. Danki Dios FPNC ta conta semper cu donacionnan cu tur luna nos ta haya di diferente wholesaler, of particular, of hotelnan cu ta contribui, anto esaki nos ta pone den dje. Loke nos ta haya di donacion nos ta agrega na e paketenan”, Directora di FPNC a relata.
Ademas di e box pa donacion di placa, den algun supermercado tin espacio, depende di e luna cu FPNC mag di pon’e, pa pone comestibel.
“Tin companianan cu un biaha pa luna, of un biaha pa aña, ta cera comestible entre coleganan y ta trece esakinan. Hopi biaha, como team building nan ta bin akinan, nan mes ta empaketa y ta yuda nos distribui esaki”, Gianaika van der Biezen a duna di conoce.
El a menciona cu e personanan cu kier haci donacion por bin na e oficina di FPNC cu nan caha di comestibel y nan ta agrega esaki na e pakete. Pa e fin di aña aki e fundacion a cuminza trempan cu peticion pa ayudo.
“Nos a cuminza trempan, e cartanan ta saliendo caba pidiendo ayudo, pasobra nos kier cubri e aña aki tur e famianan cu ta registra, y sigur di awo pa December ta bay bin mas famia den sentido cu famianan ta drenta, otronan ta sali, pero e idea ta cu nos kier duna nan pakete di Pasco. Sigur cu si, nos ta bay tin nos campañanan. Awo nos ta bezig cu back to school, unda nos ta yuda studiantenan na diferente manera, cu utilidadnan, uniform cu por ta nobo of di segunda mano, nos a paga pa algun mucha college-geld, depende di e dunador kico e ta prefera con ta yuda e muchanan, y danki Dios nos a haya hopi bon colaboracion di diferente organizacion y companianan” Gianaika van der Biezen a conclui.
