Elmar cu actualisacion di Plan Acelera di Mantenimento pa di dos cuartal 2025

ORANJESTAD (AAN): Na final di Maart 2025, e compania NV Elmar a comparti pa prome biaha un bista general di e Plan Acelera di Mantencion.

Awor, despues di e segundo cuartal, NV Elmar ta presenta un actualisacion cu ta refleha e ultimo trabounan di mantencion den nan casitanan di transformator.

   Durante e aña, por nota cu NV Elmar ta publica regularmente aviso di interupcion di coriente pa realisa trabou di mantencion. Mantencion di e red di coriente ta un parti integral di nan operacion, pa prolonga e bida di nan ekipo y pa garantisa suministro di coriente pa nos comunidad.

   Na maart 2024, NV Elmar a lansa e Plan Acelera di Mantenimento, cuminsando na San Nicolas. E mapa ta ilustra e esfuersonan cu a cuminsa na San Nicolas, a sigui pa mas o menos mey mey di nos isla, y awor nan ta enfoca riba e parti p’abou di Aruba. E plan di NV Elmar ta flexibel y ta wordo ahusta segun e necesidadnan cu surgi.

   Pa keda informa tocante trabounan di mantencion cu ta rekeri interupcion di servicio, sigui e Facebook pagina di Elmar.