Parlamentario John Hart di AVP preocupa:
ORANJESTAD (AAN)-- Parlamentario John Hart, di fraccion di AVP, den entrevista cu Matutino DIARIO a comenta, cu e fraccion a cuminza e aña aki na Januari cu un vragenuur, unda el a yama Minister di Husticia bin aden, tocante seguridad den trafico.
“Nos a cera e aña di e Comision cu e tema di Seguridad den Trafico, nos a atende un ley durante e aña tocante e tema aki, pero na Aruba nos tin un problema grandi di moralidad den con e chauffeurnan ta atende den trafico, un cu otro. Mi a sali siman pasa di Parlamento, cu un sentido di urgencia na unda cu, na mi opinion, locual cu nos ta haciendo, loke ta tumando lugar, e leynan existente, toch falta algo. E problema ta mas compleho di locual nos ta kere, pasobra nos ta ripara, basa riba cifranan hit & run ta aumentando, bo ta mas accidente, Aruba ta mas yen cu nunca, kiermen tin hopi auto riba caminda, tin e tintnan di glas di auto cu hopi biaha ta mucho scur, nos tin e situacion di nos infrastructura, tin tambe hendenan cu pa nan a bira normal cu dos cervez ta tres cervez, despues a bira normal cu bo ta bebe y core auto, el a bira normal cu basicamente bo no tin e respet pa polis, y diferente factor cu ta hungando un rol pero nos tin cu bay over na solucion; esey ta importante”, Parlamentario Hart a declara.
El a sigui menciona cu el a sali cu sentido di urgencia for di Parlamento, den sentido cu nan como Parlamento mester haci algo diferente tambe.
Locual cu e mes a haci ta sinta cu e Presidentenan di Comisionnan di Infrastructura y di Transporte, y for di Husticia nan ta bay percura pa trece algun actor hunto den Parlamento, pasobra nan tin cu bay atende cu e tema aki, riba otro nivel.
“Mi sa cu gobierno ta atendiendo cu e seguridad di trafico, bo ta wak cu nan tin nan control, pero toch bo ta sinti den pueblo cu e no ta suficiente. Y bo ta wak’e. Bo ta wak con trafico a bira mas druk, bo ta wak mas accidente, kiermen e borderline ta cu locual cu gobierno ta haciendo, aunke bo ta wak cu nan ta haciendo intento, falta algo mas. Loke falta ey ta e sentido di responsabilidad cu ta bin no solamente di gobierno ni di Parlamento, pero di esun cu ta core auto, cu ta riba e careteranan, cu mester wordo concientiza”, Parlamentario Hart a remarca.
