*Pa casnan di cuido di adulto mayor
ORANJESTAD (AAN) – E integracion entre studiantenan di EPI y adultonan mayor durante e actividad di planta mata, organisa pa Directie Ouderenzaken, a laga un impresion hopi positivo, segun directora di Departamento di Agricultura, Cria y Pesca (LVV–Santa Rosa), señora Nathalie Maduro.
E studiantenan di EPI, bou di guia di Santa Rosa y riba peticion di Directie Ouderenzaken, a traha e bakinan di mata como parti di e iniciativa. Segun señora Maduro, e proyecto no solamente a contribui na bienestar di nos adultonan mayor, sino cu tambe a brinda e hobennan un oportunidad pa pone nan habilidadnan den practica na beneficio di comunidad.
Maduro a indica cu e experiencia di traha bakinan di mata por sirbi como inspiracion pa e hobennan crea un fuente di entrada adicional door di produci y bende e bakinan di mata, specialmente na esnan cu no tin hopi espacio pa planta.
E proyecto, desaroya den colaboracion entre Directie Ouderenzaken, Santa Rosa y EPI, tin como meta pa ofrece actividadnan significante na adultonan mayor, promoviendo un estilo di bida activo tanto fisicamente como mentalmente.
Segun señora Maduro, Santa Rosa lo ofrece tayernan na empleadonan y clientenan di casnan di cuido pa adultonan mayor, unda nan lo siña tecnicanan di planta, mantencion di mata y e balornan nutricional di diferente mata. Adicionalmente, Santa Rosa lo provee gordura, mata y simianan necesario pa sostene e iniciativa.
Actualmente e proyecto a cuminsa na tres cas di cuido pa adultonan mayor, pero e intencion ta pa sigui expande e programa na tur cas di cuido.
Maduro a expresa su gratitud na Directie Ouderenzaken pa e iniciativa y a enfatisa e importancia pa sigui fortalece colaboracionnan entre diferente institucionnan.
“Nos lo sigui brainstorm con nos por sigui traha hunto, no solamente pa beneficio di adultonan mayor y e sector primario, sino tambe pa identifica otro oportunidadnan cu por nace for di proyectonan manera esaki,” señora Maduro a declara.
Finalmente, e directora a expresa su orguyo pa e studiantenan di EPI pa nan compromiso y dedicacion. Tambe el a manifesta su deseo cu mas institucionnan educativo, manera EPB y SPO, lo uni na e iniciativa den futuro, pa asina traha mas bakinan di mata y mas luga por tin facilidadnan asina pa planta.
