Derchlien Dijkhoff di Ban Serio:
ORANJESTAD (AAN) – Temporada di vakantie ta un momento special pa hopi famia, ya cu e muchanan tin varios siman liber di scol. E ta un oportunidad pa pasa mas tempo hunto, disfruta di actividadnan recreativo y crea bunita recuerdo cu famia y amigonan prome cu e muchanan bolbe scol den mita di augustus. Cu esey den mente, Ban Serio ta presenta un biaha mas su proyecto educativo Scavenger Hunto 4.0, cu ta combina diversion cu educacion durante e vakantie.
Den un entrevista cu DIARIO, Derchlien Dijkhoff di Ban Serio a informa cu e actividad ta wordo organisa pa di cuatro aña consecutivo. E edicion di e aña aki lo cuminsa dia 15 di juli y lo dura te cu dia 16 di augustus, brindando participantenan varios siman pa completa e retonan y competi pa gana diferente premio atractivo.
Scavenger Hunto 4.0 ta consisti di 10 parada y 13 pregunta cu ta invita participantenan pa descubri y siña mas tocante Aruba, den estilo di ta turista riba nan mesun isla. E preguntanan ta disponibel riba website di Ban Serio, banserioaruba.com, unda interesadonan mester inscribi y registra un nomber actractivo pa nan grupo.
Participacion ta completamente gratis y por wordo haci riba e tempo cu mas ta cumbini cada famia.
Participantenan por forma gruponan familiar di aproximadamente cinco persona, cu por lo menos un mucha di 12 aña bin abou. Pasobra e proyecto tin un fuerte caracter educativo, Ban Serio ta encurasha mayornan pa motiva e muchanan lesa e preguntanan nan mes y permiti nan busca e contestanan na mes prome.
Dijkhoff a splica cu e experiencia no solamente ta encera contesta preguntanan. Participantenan tambe por entrega potretnan y videonan di nan aventura, cu lo wordo comparti riba e paginanan social di Ban Serio y lo tin chens pa acumula mas punto pa gana e top 3 premionan grandi.
Finalmente, señora Dijkhoff ta haci un yamada na tur famia pa inscribi nan grupo, comparti nan informacion y scoge un nomber creativo pa disfruta di un experiencia educativo, recreativo y familiar durante e vakantie di scol.
