ORANJESTAD (AAN): E siman aki Minister di Turismo, Transporte y Labor, mr. Wendrick Cicilia ta na Geneve,
Suisa pa atende e di shentidiestres edicion di e conferencia di International Labour Organization (ILO). Minister Cicilia ta experenciando algun dia pisa trabao, for di mainta trempan te atardi laat y tin ora hasta anochi.
Entre e serie di reunionnan na ILO, a topa cu e Minister di Labor di Trinidad and Tobago, Señor Leroy Baptiste. E reunion cu Minister Baptiste di Trinidad and Tobago ta den cuadro di un instituto di ILO cu ta estableci n’e dicho pais y ta representa gran parti di Caribe na ILO. Tin algun acuerdo firma, caminda Aruba tin cu suministra informacion n’e instituto aki. E minister di Trinidad and Tobago a probecha e momento pa solicita n’e minister di labor di Aruba, pa splic’e riba su perspectiva pa cu e progreso laboral na Aruba.
Durante e encuentro entre e dos minister di labor, a enfoca pa crea mas conexion intensivo den Caribe p’asina sigura e posicion di nos trahadonan. E ministernan a identifica algun reto similar, manera scarsedad di labor y e maneho pa formalisa e status di e migrantenan.
Minister Baptiste a keda impresiona cu e vision di Aruba, tanto e plan pa cu energia alternativo como e maneho pa cu turismo y sin lubida e vision pa eleva e calidad di bida di nos hendenan. Minister Cicilia a splic’e den detaye riba su vision di ‘community-based tourism’, caminda e fortuna di turismo pocopoco lo yega den cada hogar na Aruba.
Na final di e encuentro, ambos diplomatico a reconoce e necesidad di colaboracion y pa busca mas aliado strategico den Caribe. Minister Cicilia a subraya e idea pa exporta conocemento pa cu e sector di turismo y di e forma ey yuda Trinidad and Tobago desaroya nan turismo den uno mucho mas floreciente.
Minister Turismo, Transporte y Labor, mr. Wendrick Cicilia a forma parti tambe di varios otro reunion caminda a toca e tema di: garantisa cu e empleadonan ta sigui contribui n’un economia formal na luga di informal. “Curason contento y carga cu conocemento nos ta sigui cu labor importante pa nos dushi isla”, asina Minister Cicilia a termina bisando.
