Na Aruba e liftnan ta wordo monitorea tur luna pa e companianan concerni cu nan instalacion

Francis Curiel, Inspector di DTI:

ORANJESTAD (AAN)-  Francis Curiel, Inspector di DTI, den un entrevista cu DIARIO a elabora riba e control di lift, cu por cierto ta wordo hopi uza loke ta haci cu nan mester funciona optimalmente.

Curiel a indica cu e cabelnan ta lo mas importante, ya cu awendia ta usando lift cu electronic bells. Nan mes ta duna señal ora tin un bell cu no ta funciona bon, y DTI ta yama e doño di e compania bise cu a yega tempo pa cambia e bell.

El a bisa cu den e parti di emergencia, si hende ta keda pega, e alarma ta bay direct sea na un call center, of na e doño di e lift, of na un operator, den e caso aki e hotelnan.

Curiel a splica cu na Aruba a yega di tin incidente, y ta bon pa ora bo subi un lift wak cuanto kilo e ta wanta, pasobra a pasa algo den un mall cu a subi demasiado hende, y e lift mesora ta duna un señal di sobrepeso, y ta dal cera y lock te ora un hende califica por bin habri’e.

Trabao di DTI ta cuida e parti aki, tanto pa e trahado como pa e turistanan pa no haya incidente serio, cu danki Dios na Aruba no a sosode ainda.

Un lift mester wordo controla tur dia, pasobra e mester ta funcional pa wordo ocupa cualkier momento di e dia. E ta mescos cu un vehiculo di motor cu ta wordo hopi uza, Francis Curiel ta splica.

El a comenta cu e aña di un lift ta mas cortico cu 12 luna, aunke afo tin algun caminda cu ta 18 luna. Na Aruba ta 12 luna pasobra ta wordo controla si e cabelnan ta na ordo, tur sistema di safe ta on, pasobra na Aruba nos ta biba den un medio ambiente cu hopi salpeter.

E salpeter cu tin na Aruba no solamente ta come e metal, pero nan ta touch e parti electronico hopi mas lihe. Tin liftnan cu e companianan concerni a instala, ta controla nan tur luna.

Ora DTI bin, nan ta controla via un lock book cu ta semper den e lift pa nan wak ki mantenimento a tuma lugar. Kiermen, aki na Aruba e lift ta wordo monitorea tur luna door di e companianan cu ta instala nan.