Director di SETAR, Ing. Roland Lacle hopi satisfecho:
ORANJESTAD (AAN) -- Director di SETAR, Ing. Roland Croes, a yama un conferencia di prensa pa comparti un momento hopi importante pa comunidad di Aruba y pa SETAR N.V tambe.
Ta trata aki di un acuerdo pa 20 scol publico por wordo poni riba un “high speed” di internet atravez di fiber. Un proyecto cu probablemente entre Augustus y September proximo, lo ta full cla.
Roland Croes a duna di conoce cu e compania a firma cu DPS (Departamento di Scolnan Publico), unda Minister di Enseñanza a firma pa e fase 1 cu ta abarca 20 scol.
“E ta parti di un proyecto cu SETAR a cuminza, cu nos a firma cu SKOA algun tempo atras, cual prome y di dos fase a caba. E intencion ta pa e scolnan na Aruba bay pa e siguiente nivel, pa den cualkier circunstancia manera e tempo di pandemia, cu mi ta spera no bin nunca mas, cu scolnan mester ta online na cas. E reto nobo aki ta duna e posibilidad cu si algo tuma lugar e lo bay hopi miho den sentido cu e tecnologia aki ta bira posible, y sin mucho problema por atende miho cu e parti di online learning”.
Director di SETAR a expresa cu e compania ta hopi contento di por a contribui cu esaki, y di a duna tur scol un oferta hopi special, y hopi scol a haci uso di esey tambe, y nan por atende hopi miho cu nan cantidad di studiante, si cualkier cos por pasa.
Banda di esey, señor Roland Croes a bisa, por ripara cu scolnan a bira mas y mas digital, cu tur kier wifi y tur kier pa e studiantenan ta conecta den e klasnan tambe y den futuro ainda mas, lo tin screen grandi tambe cu ta mas interactive na momento di duna les, y por wak con e mundo ta bayendo cu tur e posibilidadnan cu tecnologia ta duna.
Croes a reitera cu e compania ta hopi contento di a logra esaki y tambe pasobra e Minister a haya tur aprobacion tambe pa por a haci esaki posible, y cu Setar por colabora cu enseñanza pasobra sin enseñanza un pais no ta yega leu tampoco.
