Dia di Betico
ORANJESTAD (AAN): Desde aña 1989, tur aña dia 25 di Januari Aruba ta celebra dia di Betico. Esaki ta un dia nacional dedica na un gran yiu di tera cu a marca historia pa Aruba. A scoge e fecha aki 25 di Januari, como cu e ta e fecha natal di e gran estadista Gilberto Francois (Betico) Croes.
Di e forma aki Aruba por dune su homenahe bon mereci y asina un y tur por keda recorda su lucha pa a logra Aruba su Status Aparte, e lucha cu a marca historia.
Betico tabata un persona semper cla pa yuda tur hende: Señor Betico Croes a nace 25 di januari 1938. Betico ta yiu di Mimita y Panchico Croes (q.e.p.d) . Desde hoben e tabata tin un gran simpatia pa su distrito Santa Cruz y tabata activo riba diferente tereno.
E tabata conoci como un studiante sobresaliente y tabata cla pa yuda na cualquier ocasion. Betico tabata un yiu ehemplar cu tabata yuda tanto su mama y tata den nan trabaonan . Semper e tabata tin hopi amigo y tur tabata bon bini cerca dje na su cas.
For di hoben caba Betico a defende nos isla: Despues di a termina 3de klas di HBS na St. Dominicus College, el a bay Hulanda pa studia pa maestro di school.
Desde cu e tabata studiante na Hulanda ,ela cuminsa propaganda y defende nos isla.
Hopi tabata e discusionan cu el a hiba durante cu e tabata studiante na Hulanda pa convence su amigonan Hulandes cu Aruba mester mas reconocimiento y cu e lucha, cual a worde inicia pa politiconan grandi di Aruba mester continua. El a haci su esfuerzo pa termina su estudio, pensando riba su isla, cual e tin cu bin trahe pe.
Na 1959 el a termina su estudio y el a regresa Aruba pa bin traha pa e hubentud Arubano. Desde 1959 pa 1969 el a traha na St. Jozefschool na unda e mester a organiza celebracion di 25 aña di existencia di e school. Tabata pa promer biaha cu St. Jozefschool, actualmente Colegio San Jose, a conoce su propio banda. Tabata un celebracion cu a conmovi Santa Cruz por completo y tur hende tabata tin palabra di elogio pa e forma especial cu sr Betico Croes y e comision a celebra e di 5 lustro di St. Jozefschool. Betico no tabata activo solamente na school, pero tambe den diferente organizacionan social di Aruba. Tambe e tabata hopi activo den misa como dirigente di e coro y den otro actividadnan di misa.
Tambe Betico a traha añanan largo na St. Antonius College na Santa Cruz . Fuera di su Hoofdakte, el a obtene e diploma LO Spaans y LO Handelsrekenen.
Betico Croes a drenta arena politico pa lucha pa su pueblo: Despues di a drenta enlace matrimonial dia 18 di december 1962 cu Glenda Croes, di cual matrimonio a nace 4 yiu , el a tuma un paso importante na 1967.
El a drenta politica activo na 1967, algo cu henter nos pueblo tabata desea y cu semper tabata hancra na su curazon. Betico cu e paso aki a sacrifica su famia completo pa bay traha na fabor di e deseo y lucha di nos pueblo.
Den e mesun aña el a worde postula como candidato no. 5 ariba e lista di AVP. For di e tempo ey e pueblo votador a conoce como un gran lider, un gran luchador pa nos causa.
Dia 1 di juli 1967 el a worde nombra como diputado y a keda ocupa e puesto aki te cu 1970. Como diputado Betico a habri un era nobo den politica na Aruba. Betico a cuminsa cu school di waiters, mirando e interes cu tabata existi pa nos turismo. Hopi yiunan di tera a obtene un beca pa bay studia den exterior pa despues bin traha pa e futuro di nos comunidad.
Scolnan na Macuarima,Pos Chiquito a worde construi y expansion di Colegio Aruba, John F Kennedy School y diferente otro schoolnan a tuma lugar tempo cu Betico tabata diputado.
E Sporthal na Santa Cruz tambe tabata un di e proyectonan di Betico, tempo cu e tabata diputado. Cu hopi esfuerso el a logra convence expertonan e tempo ei cu Santa Cruz ta e lugar ideal na unda e Sporthal por worde construi, mirando su situacion central.
Durante cu e tabata diputado el a convence gobierno Hulandes cu Aruba mester algun bibliobusnan pa motibo cu pa hopi studiante cu ta biba pafor di Oranjestad, ta dificil bira miembro di e Biblioteca Publico, pa motibo di transporte. Awendia hopi mucha di school basico ta lesa buki y ta miembro di e biblioteca.
Esaki tambe a yuda cu hopi studiante di otro distrito a progresa den nan estudio.
Betico a dicidi di lanta su propio partido: El a bira e politico cu a haya mas voto ariba su nomber: Dia 9 di februari 1971 MEP a ser funda na su cas y dia 14 di februari1971 el a keda nombra como lider y presidente di MEP.
Door di su guia pefecto MEP a crece y bira e partido mas grandi di Aruba.
Pueblo di Aruba a dune y su partido e respaldo necesario pa realisacion di nos Status Aparte. Betico a kibra tur record di tur politiconan di pasado, den obtene cantidad di voto.
Betico ta e politico cu mas tanto voto a haya riba su nomber. Desde September 1973 e tabata lider di e fraccion di MEP den Staten di Antiyas. Despues di elecion di 1975 el a keda nombra como consehero general di Bestuurscollege di Aruba. Tambe Betico tabata miembro di Parlatino (Parlamento Latino Americano).
Publicamente Betico a expresa cu su famia ta Aruba: Betico tabata un persona hopi creyente. Su fe den tata tabata grandi, e tabata un persona cu publicamente tabata demostra esaki tambe. Virgen di Alto Vista tabata su mihor intercesora dilanti Tata. El a haya un bon educacion di su mayornan riba e tereno aki y esaki sigur a yude den tur su exitonan.
El a sacrifica su famia, su yiunan pa a traha pa e pueblo. Betico tabata y ta un persona stima, e tabata tin un carisma enorme. E tabata tin tempo pa tur hende y dia di su ultimo homenahe enconeccion cu su di 15 aña den politica, Betico a brota for di su curazon, palabranan cu a bay pa historia cu hamas nos por lubida.
Betico publicamente a pidi su famia disculpa pa e poco tempo cu e tabata tin pa nan, pasobra su famia ta un famia grandi, su famia ta Aruba. Betico a considera su mes como e tata di e pais Aruba.
Dia 22 di November 1985 den Ser'i Noka un Betico sumamente emociona a tuma despedida di su pueblo ya cu tabata e ultimo biaha cu Betico tabata den un evento asina grandi dilanti di su pueblo.
Encurasha hobennan: Betico a encurasha hobennan pa studia pa por traha pa futuro di Aruba. Antes nunca politiconan tabata preocupa nan mes cu e abusonan cu tabata worde cometi contra nos isla, door di e isla di mas grandi, pero tabata acepta tur abuso contal nan keda cu puesto.
Betico desde cu e tabata maestro di scol, tabata hinca den cabez di studiantenan pa studia bon pa despues nan por traha pa futuro di Aruba.
Betico a mustra nos e balor cu nos isla ta posee. Awor nos tur ta bisa cu nos ta Arubiano enbes di Antiyano. Betico a trece un union den nos pueblo y a kibra cu tur sistema descriminatorio cu tabata existi antes. Tur hende ta igual y tur hende por biba feliz aki na Aruba, sin pensa ariba grupo of rasa. Betico a mustra nos e importancia di e lucha di nos pueblo.
Betico nunca tabata tin miedo pa demostra mundo e deseo di nos pueblo! Na diferente ocasion, durante reunionan cumbre entre e islanan, tanto na Hulanda, Surnam, Curaçao, Bonaire y Islanan Ariba, Betico a duna su opinion e defende esaki tambe, sin miedo kisas pa su bida.
Cuanto biaha el a worde intimida y menaza, pero nada a stop e di demonstra su deseo pa cu nos isla y su independencia e tempo ey.
Betico a encabesa diferente comisionan cual a bishita diferente paisnan manera Hulanda,Venezuela, Inglaterra, Merca ( Nacionan Uni), Colombia, Panama, Costa Rica y Surnam pa hiba e mensahe di e deseo di nos pueblo pa e gobiernonan di paisnan ariba menciona. For di e diferente paisnan aki el a ricibi promesanan di apoyo pa cu deseo di nos pueblo.
Propio Himno y Bandera: Betico, como Consehero General di gobierno insular di Aruba e tempo ey, a conseha e gobierno insular pa percura pa Aruba tin su propio Himno y Bandera oficialmente. Duro a worde traha y hopi critica, manera semper, Betico a haya ,pero awe nos tur ta orguyoso cu nos isla, pa chiquito cu e por ta, tin su propio Himno y Bandera.
Despues cu tanto Hulanda como Nacionnan Uni a conseha gobierno insular di Aruba pa organiza un referendum pa sa exactamente e berdadero deseo di nos pueblo, Betico hunto cu e diputadonan a percura cu e referendum lo tuma lugar. No solamente Betico tabata desea di sa e deseo exacto di nos pueblo, pero como politico responsabel pa cu e futuro di Aruba, a mira esaki necesario. El a percura e tempo ey pa duna nos pueblo tur informacion cu nan tabata desea. Pueblo no solamente a bay vota den referendum simplemente como simpatisante di nos lucha, pero despues di a haya tur clase di informacion y tabata convenci cu esaki tabata pa salbacion di Aruba. Despues di e referendum henter mundo tabata na haltura di e deseo di e pueblo Arubiano.
Betico no a importa puesto, pero pa realisa e deseo di e pueblo Arubano! Betico a nace pa traha pa Aruba. Betico a nenga tur puestonan, simplemente pa e keda como representante di nos pueblo den Staten di Antiyas y Eilandsraad di Aruba. Ta eyden el a convence e contra partidonan di e deseo di e pueblo y cu no tin ningun hende na mundo cu por a desvia nos for di e pensamento ey.
Betico no a importa puesto pero realisacion di e deseo di e pueblo Arubano. Ta Hulanda a bisa nos cu nos mester bira indepediente promer cu 1980. Surnam a disidi di bira independiente na 1975 mientras cu politiconan di Curaçao tabata a punto di pone un fecha pa nos independencia den forma di un federacion, a base di one man, one vote.
PPA y e tempo ey AVP a bay completamente di acuerdo y no a reacciona. Gracias a Dios cu MEP a worde funda, bao guia di Sr. Betico Croes, cu a stop cu tur e abusonan aki.
Aruba independiente di e otro islanan awendia por dicidi riba tur su bienesnan, cu un palabra riba su futuro, pero un Aruba den un federacion, ta politiconan di Curaçao a dicidi pa Aruba. Nunca Aruba lo no por a bisa nada, pasobra Curaçao ta mas grandi y cu mas habitante y representante. Pero MEP a habri wowo di Arubianonan y mustra nan e importancia pa ta independiente, riba nos mes.
Awe nos por ta orguyoso cu nos propio yiunan di tera ta dirigiendo destino di nos isla.
Y desde 1989 Aruba ta recorda e gran baluarte aki cu un dia dedica na su honor.
