ORANJESTAD (AAN): Siman pasa, Minister di Turismo Dangui Oduber a reuni cu e 'airlift committee' pa haya un mihor bista riba tur e desaroyonan cu ta tumando lugar den e trafico aereo di Aruba.
E 'airlift committee' su tarea ta pa sigui atrae mas aerolinea pa scoge Aruba como nan destinacion. Actualmente Aruba ta posiciona su mes como un destinacion hopi atractivo pa e aerolineanan.
Minister Oduber a indica cu actualmente tin 25 aerolinea cu ta bulando pa Aruba for di 28 diferente destinacion. Minister a sigui bisa cu actualmente Aruba a recupera 86 porciento di nos turismo compara cu aña 2019.
E cantidad di stul aereo (Air Seat Capacity) cu tin na 2021 ta 1,350,852 y esaki ta 21 porciento menos cu na 2019. Minister a indica cu segun e pronosticonan den aña 2022 Aruba lo tin un “Air Seat Capacity” di 1,718,176.
Den comparacion cu Mexico y otro destinacionnan den Caribe, e ganashi cu Aruba ta genera pa e aerolineanan ta mucho mas halto. Esaki ta haci cu actualmente Aruba ta un mercado hopi atractivo pa e aerolineanan, es decir un destinacion cu lo kier cuminsa cu vuelonan. Ehempel di esaki ta Frontier Airlines cu ta bay cuminsa bula e ruta di Miami pa Aruba entrante 20 di November. Otro ehempel ta Delta Airlines cu ta bay cuminsa bula e ruta di Boston pa Aruba dia 18 di December.
Norte America
E mercado di Norte America ta keda e mercado di mas grandi y importante pa Aruba. Di tur e vuelonan di USA pa Aruba 92 porciento ta vuelonan for di e parti oost, middle west y zuid di USA. Estudionan haci ta indica cu ainda tin hopi oportunidad pa agrega mas vuelo for di e area aki di USA. Tin espacio amplio pa stimula e demandanan.
Minister a indica cu ta considerando pa explora e mercadonan di Pittsburg – Hartford – Cleveland y Detroit. Tambe lo bay reanuda vuelonan bek for di La Guardia – Chicago – Dallas y Minneapolis, esaki ta noticianan sumamente positivo pa Aruba.
Sur America
E mercado di Sur America tambe ta creciendo firmemente aña pa aña y tambe ta un mercado cu hopi potencial pa Aruba. Specialmente Colombia ta un di e paisnan cu ta demostrando di tin hopi oportunidad pa amplia cu mas destinacion.
Minister Oduber a señala cu Colombia ta e mercado mas grandi den Sur America. Tin hopi interes pa bin cu vuelo directo for di Medellin y tambe ta explorando activamente pa bin cu vuelonan directo for di e ciudadnan di Barranquilla y Cali.
Oduber ta satisfecho con Aruba su turismo ta desaroyando y tambe hopi optimista di con turismo lo sigui den aña 2022. Ban sigui avansa hunto como pais pa como pais nos yega bek na 100 porciento di recuperacion di nos turismo compara cu aña 2019.
