Un paso grandi pa desaroyo
ORANJESTAD (AAN): Representantenan di CEDE Aruba y FCCA a firma un acuerdo di colaboracion cu lo dura pa cinco aña. E meta di e acuerdo aki ta pa fortalece e programanan existente den bario y mehora e servicio- y facilidadnan pa e residentenan. E firma di e acuerdo aki ta un paso grandi den e direccion corecto pa un futuro mas prospero pa nos barionan.
CEDE Aruba, ta un organizacion di desaroyo y financiamiento ariba tereno social y desaroyo sostenibel, cu ta enfoca su energia y recursonan pa promove avance den nos comunidad Arubano. Recientemente, nan a lansa un plan ambicioso dedica na desaroyo di bario, den cual nan lo sostene organizacion y iniciativa di bario, y colaboracion entre instancianan. E proyecto aki, a ricibi apoyo di varios centro di bario y ayudo financiero di gobierno di Aruba y mas partner financiero.
FCCA, na su turno, ta dedica su esfuerso riba solucionnan pa e falta di casnan social na Aruba. Nan meta ta pa tur famia Arubano, particularmente esnan cu ta enfrenta retonan grandi pa haya un cas, por conta cu un hogar. Pero nan vision ta bay mas leu; FCCA ta traha activamente pa mehora e calidad di bida den nan barionan, pa promove diversidad, y pa organiza actividadnan cu por enrikece e bida di su residentenan.
Door di firma e acuerdo aki, CEDE Aruba y FCCA a planifica pa traha hunto riba varios iniciativa. Esakinan ta inclui financiamento di proyectonan den bario, desaroyo y mantencion di facilidadnan recreativo den barionan, y pa e comunidad en general. Nan ta buskando pa colabora cu otro organizacionnan cu tin e mesun vision, manera IBiSA, FFD, y varios NGO’s, y departamentonan di gobierno, cu e meta final pa contribui na mehoracion di calidad di bida y desaroyo di barionan mas sano, inclusivo y uni.
Esaki ta un paso grandi den e caminda pa creaccion di un futuro mas prospero pa nos barionan y nos comunidad. E acuerdo entre FCCA y CEDE Aruba no solamente ta refleha nan dedicacion y compromiso, pero tambe e potencial grandi pa cambio positivo. Nos por mira dilanti cu confianza y speranza, sabiendo cu e organizacionnan aki ta trahando activamente pa construi un Aruba mas fuerte y uni.
