Sandy van Tol di AvvB: --ORANJESTAD (AAN): Dialuna mainta Formador Evelyn Wever Croes un biaha mas a sinta cu diferente stakeholder, relaciona cu formacion di Gobierno.
Un di e stakeholders tabata e Asociacion di Conseheronan di Impuesto di Aruba(Arubaanse vereniging voor Belastingconsulenten AvvB).
Durante un conferencia di prensa Sandy van Tol di AvvB a splica cu tabata un hopi bon reunion cu Formador.
“Tabata un encuentro habri, constructivo y positivo, mientras cu tabata tin hopi comprension”.
E esencia di e combersacion tabata cu mester bin mas balans entre e pagador di belasting y e organo di ehecucion, mientras cu e legislacion mester ta transparente y stabil, segun van Tol.
El a sigui bisa cu e ta hopi satisfecho cu con e reunion a bay.
Segun van Tol, tabata hopi bunita pa wak cu tabata tin hopi comprension di parti di Formador, pa e puntonan cu AvvB a trece dilanti.
“Ta hopi cla cu un reforma fiscal por tuma lugar solamente cu e ‘goodwill’ corecto bao di tur stakeholder y cu e ehecucion corecto for di Servicio di Impuesto”, segun van Tol.
DIARIO a puntra pa un splicacion mas amplio riba e balans riba cual a wordo papia y van Tol a splica cu aworaki falta balans entre e derechonan di esnan cu tin cu paga belasting y implementacion di e leynan fiscal.
“Aworaki hopi biaha tin aanslagen incorecto di belasting of ‘verekening’ di banda di Servicio di Impuesto cu ta haci cu e pagador di belasting no tin mucho claridad riba su posicion”.
E pagador di impuesto kier tin claridad y kier sa unda nan ta para, kico nan tin cu paga, kico ta e aanslagen cu nan tin cu paga y si tur cos ta bon calcula, segun van Tol, kende a indica cu e pagador di belasting kier un mihor splicacion riba locual nan tin cu paga.
