Na 2002 na costa di Aruba tabata tin rifnan chikito cu ya pa 2022 no ta visibel mas

Christie Mattes, Coordinador di Proyecto:

*E ultimo 20 añanan Aruba a perde 20% di rif y 10% di su areanan di rif 

ORANJESTAD (AAN) – Christie Mettes, Project Coordinator di Surfside Science, na Metabolic Foundation, den entrevista cu DIARIO a menciona, cu un di e cosnan cu nan ta haci ta midi e grandura di e rifnan y nan forma, y ta usando e imagennan satellite. Nan ta midi pa wak cuanto tur a perde di cada rif di coral.

El a relata cu a wak cu den e ultimo 20 añanan a perde casi 10% di e area di rif cu tin  riba e costanan di Aruba. E impacto mas grandi ta den Playa y San Nicolas, y un impacto menor den e parti meymey.

“Adicionalmente, riba e potretnan nos por a wak cu durante e aña 2002 tabata tin varios rif chikito, cu ya na aña 2022 no ta visibel mas. Pues, un cantidad di 14 rif chikito a bin ta disparce”, Mettes a menciona.

Christie ta pensa cu kizas e rifnan aki tabata mas grandi, ya cu nan a mira riba potret di e mapanan bieu di Aruba, cu e rifnan ta hopi largo y fini, y e rifnan chikito por ta piezanan cu a cuminza kibra caba. “Nos a wak e proceso aki pasando tambe riba 5 rif cu nos a logra midi. Por ehemplo, na Renaissance Island cu e punta di e isla a kibra y e ora ey envez di un isla largo e ta bira un isla grandi y un isla chikito. Anto, e isla chikito ta esun cu nos ta wak disparce despues, cu tempo, y den algun caso, no den tur”, Christie Mattes a splica.

El a agrega cu por mira tambe cu e islanan ta bira di un forma largo na un forma mas rondo, y esaki ta mas visual den un di e rifnan cu tin na Rodgers Beach, cu tabata hopi largo y den un potret reciente por mira cu a bira un rif rondo chikito.

“Ora cu nos a haya e resultado nos tabata un tiki shock di e perdida pasobra e ta 20% di e rifnan cu tin y 10% di e area, considerando cu esaki ta e barera, manera mi colega Suyin a bisa, entre Aruba y lama habri cu ta proteha nos den momentonan di tormenta y e ta nos costa economico tambe cu ta proteha door di e rif”, Christie a señala.