Minister Ursell Arends, titular di Medio Ambiente:
ORANJESTAD (AAN) – Minister di Medio Ambiente, Ursell Arends a comenta den entrevista cu DIARIO, cu e ultimo seis lunanan a bin cu hopi sushedad, loke ta un cambio pa Aruba su cultura, sistema di bida y con nos tin cu anda cu desperdicio.
E mandatario a aclarea algun percepcion cu tin eyfo, cu mester atende cu nan. “Aworaki no ta prome biaha cu Aruba ta sushi. Na 2012 a instala un task force cu a bin cu un serie di recomendacionnan pa gobierno, cu tabata yama ‘Cero Tolerancia’ y e tempo ey e dump tabata habri. Na 2018 atrobe a instala un comision pa bin cu un serie di recomendacion pa gobierno, y tampoco e dump tabata cera e tempo ey. E sushi cu tin rond tira, no ta sushi cu a yega nos cas, pasobra si e yega nos cas nos tire den un bari di sushi y nada ta cambia, pasobra pa recogemento di sushi di cas, nada a cambia”, e dignatario a expresa.
Otro percepcion cu e kier a aclarea ta ora nan ta bisa cu e prijs a subi drasticamente, y esey ta haci cu e sushi ta wordo tira den mondinan, den naturaleza y banda di caminda.
“Mester bisa cu antes bo tabata paga 25 florin pa tira un pick up di sushi na dump, y abo tabata contribui na e seroe cu tin awe. Esey tabata loke bo tabata paga pa sigui crece e seroe, aworaki un pick up pa pone tur desperdicio mezcla ta costa alrededor di 45 pa 48 florin, bo ta hibe na e compania priva unda ta wordo procesa y separa. Algun compania ta recoge cierto tipo di desperdicio pa procesa nan den materia prima cu nos por uza localmente of nos por exporta, y esey ta e diferencia”,
Minister Ursell Arends a indica. E dignatario a comenta cu Diahuebs cu a pasa, tanto DOW como BCI, Serlimar y Bureau di Minister Presidente y di su Ministerio a sinta dialoga pa wak unda por bin mehoracion pa loke ta limpieza y recogemento di e sushi cu ta wordo tira rond di caminda, y a haci palabracionnan concreto, y despues di vacacion gobierno ta bay bin cu un Plan Nacional di concientizacion pa comunidad pa atende cu desperdicio, y ta bin cu un campaña nacional pa cu esaki, manera tabata tin den pasado, pero aworaki mas riguroso, y laga comunidad tambe participa pa tene Aruba limpi.
