ORANJESTAD (AAN): Diadomingo awor agrupacion ORUBA lo presenta dos concierto fenomenal pa 3:00 pm y 7:00 pm den sala grandi di Cas di Cultura.
DIARIO a compronde cu e agrupacion Oruba ta consisti di e musiconan Reno Steba, Jeremy Bonarriba, Serghio Jansen, Jaderick Croes, Papito Raphael, Arthur Kelly, Johnny Scharbaai y Hubert Thiel.
E show lo estrena coreografia di baile di Oruba Dancers cu Marcie de Jongh, Thayisa Farro y Charlotte Lisere.
E concierto yama Totumba, cu ta referí na e comchi di klei for di cual indiannan tabata bebe awa. A scohe un pa un nomber cu ta refleha nos antepasadonan pasobra e tipo di musica ta e fusion di ritmonan di antes cu harmonianan modern.
Publico por spera un show varia cu lo ta rico den ritmo, baile, e aspect visual, composicionnan nobo y original, netamente traha pa nos top musiconan profesional Rubiano, lidera bou di nos orguyo internacional Reno Steba.
Totumba ta un continuacion di Music Exposure, Cas di Cultura su iniciativa pa pone musiconan local riba su tarima, exponiendo talento y treciendo entretenimento di calidad.
