Militarnan Hulandes lo bay hisa un fli masha grandi mes den Parke Arikok

Unidad tecnico di Forzanan Real di Ehercito ta entrena atrobe den region Caribe

ORANJESTAD (AAN): Un unidad tecnico procedente di Hulanda di Forzanan Real di Ehercito ta eherce durante e periodo benidero ehercisionan tanto na Aruba, Curaçao y St. Maarten.

   E siman aki ekiponan grandi cu ta regarda esaki ta yega Curaçao via transporte maritimo. E ehercisio, titula ‘Caribbean Engineer’, ta cuminza riba Dialuna 27 di September y ta dura cuater siman.

   E unidad, ‘101 Geniebataljon’, ta consisti di tecnico/ingenieronan cu diferente experticio. Nan ta militar y tambe specialistanan riba tereno di construccion. E periodo benidero nan ta ehecuta un programa cu, di un banda ta consisti di diferente training militar (entre otro na Wacawa y Parke Nacional Arikok), y di otro banda nan ta bay cuminza cu multiple tarea di construccion pa diferente entidad, entre otro pa Defensa mes.

   Fli masha grandi: Di e forma ey e expertonan den construccion, encarga pa Carmabi ta bay cuminza den e area di naturalesa na Sint Joris (Curaçao) cu un brug pa peaton na un crusada di awa chikito.

   Na Parke Nacional Arikok na Aruba e militarnan ta sostene entre otro un proyecto di sostenibilidad di ‘Kite Power’, caminda ta bay haci un test, pa genera energia pa medio di un fli grandi. Diferente servicio ta nesesario pa esaki.

  Tambe pa Defensa mes e unidat di ekspertonan ta bay cuminza traha. Asina na Cazerne di Marina na Saveneta ta bay construi un cas pa praktica ehersisionan di ‘desempeñonan den areanan urbano’.

  Train den Clima aki:  Esaki lo bay ta un training den circunstancianan climatologico desafiante.  Specialmente pa e unidad cu ta bini for di Hulanda, e ehercisio na Aruba, Curaçao y St. Maarten tin un valor agrega amplio.

   E circunstancianan climatologico den Region Caribe ta comparable cu e circunstancianan den hopi areanan di mision. Pa e motibo ey e ehercisio aki ta duna e oficialnan di ehercito e chens pa por train den circunstancianan similar.

   E unidad ta consisti di mas cu 150 militar cu ta reparti y ubica riba e tres islanan. Pa e trabaonan di construccion tin 40 vehiculo militar pa construccion cu a keda manda via transporte maritimo pa Curaçao y Aruba.

   E barco a yega den waf di Willemstad, unda un parti di e vehiculonan ta keda descarga eynan, y despues e barco ta sigui nabega direccion Oranjestad na Aruba. Un parti chikito di e unidad ta sigui un programa di ehercisio na St. Maarten. E ehercisio ‘Caribbean Engineer’ ta dura te cu dia 22 di October.

   Protocolnan pa cu Covid-19: Tur e militarnan cu ta biaha y ta drenta pais, adelanta (no mas cu 48 ora) a keda di test negativo pa Covid-19 y ta completamente vacuna. E unidad ta sigui cu e instruccionnan cu ta valido na Aruba, Curaçao y St. Maarten.