ORANJESTAD (AAN): Riba Diaranson, DIARIO a tuma nota di un informacion cu Aeropuerto Internacional Rafael Núñez na Cartagena (Colombia),
a caba di haya luz berde pa bay amplia nan Terminal via di un inversion priva, pa asina nan por yega na un capacidad di 6,5 miyon di pasahero cada aña.
Y un di e beneficionan di esaki, ta cu nan ta bay reduci nan airport-tax di salida pa pasaheronan domestico cu lo bira 26,9% menos. Pa pasaheronan internacional, e airport-tax lo baha cu 6,38%.
E informe ta splica cu esaki nifica, cu Cartagena lo bay bira un destinacion hopi competitivo, cu un airport-tax cu lo ta menos cu esun cu ta cobra na Aruba, of cu ta cobra na Cancún (Mexico).
Segun e boletin, e airport-tax pa pasaheronan domestico lo baha for di 24.100 pesos pa 17.600 pesos. Pasaheronan internacional lo bay nota cu nan airport-tax a baha for di US$ 47 pa awor US$ 44.
E inversion den e Aeropuerto lo bay ta di 383 mil miyon Pesos (como 99 miyon Dollar) cu ta inclui remodelacion di terminal existente, ampliacion di platform pa avionnan, construccion di un edificio nobo pa vuelonan International, aumenta e cantidad di espacio di parkeo pa autonan, y prolongacion di e trabao di mehora e pasiyonan, y tambe e gateway cu ta yuda pasaheronan subi y baha di avion mas rapido. E lo bira un proyecto cu ta dura 3 aña.
