ORANJESTAD (AAN)/WILLEMSTAD – Awo cu e periodo di pandemia ta tras di lomba y poco poco farandula ta normalisando, KIZZME ta bek cu un compa melodico titula ‘ONLY WITH YOU,’ cu e talentoso cantante QSHANS.
Specificamente, e cantica sensual ta un ‘Compa Gouyad,’ cu elemento nan di zouk y ritmo combina, pues un perfecto cantica pa baila riba un tegel. ‘ONLY WITH YOU’ a keda skirbi y composita pa QSHANS, Mr. Ray Bass y AJ GRAND, kende tambe a aregla e piesa.
Qshans
E ultimo añanan tras di lomba, Qshans a traha duro riba su carera artistico, posicionando su mes como un vocalista di peso den e genero di Ritmo Combina na Hulanda.
Manera ta conoci, el a milita den front di Cache Deluxe and Cache Royale pa varios aña. Como solista, Qshans a sigui saca diferente single manera ‘No Trata Mi Asina’ cu Stanley Clementina, y ‘Mas Mi Drai’ hunto cu Ivanhoe Willems, tur dos na 2020.
Entre 2016 pa 2019, Qshans a marca pauta ora el a realisa su soño y penetra den e mundo di theater na Hulanda cu su actuacion den ‘The Lion King’ como e suplente pa e rol di Banzai.
Tambe Qshans a figura den ‘Mama Mia’ como Pepper y den ‘Sister Act’ como TJ, Pablo y Eddie Fritzinger na Oberhausen, Alemania, y ultimamente e obra basa riba bida di e legendario Tina Turner.
Qshans lo ta na Curaçao y Aruba pa algun presentacion exclusivo.
Plannan grandi
Na 2017, KIZZME a keda funda na Hulanda pa e basista y cantante Riendy Holder, mihor conoci como Mr. Ray Bass, kende a uni forza cu talentoso compositor y musico Andre ‘AJ GRAND’ Pantophlet y Orville ‘OMD’ Mac Donald pa asina forma e nucleo musical di e banda.
E banda afrocaribense ta conoci pa su abilidad distinto di crea un sonido unico unda ta meks Kizomba, Zouk, Compa, Semba y musica afrocentrico. E resto di integrantenan di KIZZME ta cantante Nilson Silva, Natalia Santos, Marise Barbosa Verela di Cabo Verde, y percusionista Kevin Leito di Curaçao.
E colaboracion cu Qshans ta tipico e manera di colectivo con KIZZME ta funciona, unda su integrantenan ta traha tambe riba nan respectivo proyecto individual.
Pa e piesa aki KIZZME a traha tambe cu dos musico di Martinique y Fransia cu a yega di milita den Cassav.
Foi cuminzamento di e aña aki, KIZZME a traha hopi riba nan estilo y produccion musical y a ranca sali cu diferente composicion propio nobo.
KIZZME tin plannan grandi pa e aña aki, unda nan lo lansa diferente piesa den e lunanan benidero. Dia 11 di juni benidero, KIZZME lo presenta ‘ONLY WITH YOU’ na e evento di baile SILENT KIZZ na Amsterdam, unda nan lo deleita entre otro e fiel bailado di kizomba y compa, cu ta gosando di un otro ola di popularidad.
Ultimamente KIZZME tin como meta pa uni tur hende via muzik afrocaribense, treciendo nan hunto apesar di nos diferencia di idioma y cultural.
