PORT OF SPAIN: Polis di Trinidad & Tobago a confirma cu nan a logra rescata un dama venezolano, kende a wordo secuestra siman pasa Diamars for di su cas na pueblo di Arima.
Polis a confirma, cu e muher Maryeisy Carolina Barrios Baldallo di 22 aña a wordo rescata banda di 9:30 pm, segun e corant Trinidad Express.
E muher di origen venezolano a wordo hiba pa un Hospital pa wordo samina y evalua, y ricibi tratamento medico. E muher ta bibando na Trinidad & Tobago pa mas di un aña caba, y e ta mama di dos yiu.
Segun autoridadnan di e isla, e muher a wordo saca forzosamente for di su cas den oranan di Diamars marduga, esta 2:15 am na pueblo di Wallerfield cerca di ciudad di Arima cu ta situa na parti noordoost di Trinidad, y cu tin 35.000 habitante.
E secuestro a socede ora cu dos homber a drenta e cas, cortando dos candal, mientras cu 2 homber mas y un chauffeur a keda pafo. Esnan cu a drenta, a mara Alex Rodriguez di 35 aña, y Levisa Garcia di 49 aña, ambos venezolano y famia di e muher. Ademas e hombernan a horta un TV, varios laptop computer, smartphone, un microwave oven, y un machine pa corta yerba.
Net cu nan tabata cl pa bay, diripiente nan a gara e dama Maryeisy Baldallo y a push'e pafo y pone bay sinta den nan vehiculo, cu ta un SUV color preto.
Despues cu e delincuentenan a bandona e cas, e pareha a logra di los nan curpa, y asina bati alarma. Autoridadnan a core full rond den e area, pero no por a localiza e muher.
No a haya informacion di e motibo di e secuestro, ni tampoco si nan a paga cierto cantidad di placa na e secuestradornan. Unico cos ta cu e dama awor ta safe.
