Balor di berdura subiendo internacionalmente
BRISBANE: Den fin di siman, un consumidor na estado di Queensland na parti noordoost di Australia a bin topa cu lechuga Iceberg cu tabata wordo bendi den un Supermarket na prijs di $11.99. El a saca potret, y rapidamente esaki a bira viral como prueba di e presion enorme cu productonan tin awor riba cartera di Australianonan.
E prijs di 11.99 Dollar Australiano ta igual cu 15,56 Florin Arubiano.
Den pasado, prijs pa lechuga Iceberg na Australia tabata costa como Aus$2.80 pa uno (como 3,63 Florin) y esaki a pone bira awor e enfoke di inflacion. Esaki ta demostra cu mescos cu resto di mundo, na Australia tambe nan ta sufriendo di aumento rapido den prijs di cuminda.
No ta djis lechuga cu ta subiendo drasticamente di prijs. E ultimo Indice di Prijs di Consumo pa Australia a mustra un aumento anual di 12,7% riba costo di berdura. Den e ultimo seis luna, un kilo di Batata Dushi a subi for di Aus$1.88 pa Aus$4.24 awor. E costo di concomber a redobla, esta for di Aus$1.50 pa uno, y awor e ta $3.50 pa uno.
Un saco di ciboyo bruin a subi for di Aus$2.00 pa kilo, pa awor Aus$2.90. Un boshi di selder a subi for di $3.00 pa awor $4.50. Cuatro zucchini a subi for di $2.94 y awor ya ta na $4.68.
Na aña 2018, broccoli tabata $3.90 pa kilo, pero awor na 2022 e ta na Aus$9.90 pa kilo. Ta tur caminda rond mundo por nota aumento drastico den prijs di broccoli.
Na Melbourne (Australia), a topa siman pasa un Patia cu e prijs di Aus$25.52 (como 33,10 Florin) y esaki di berdad a spanta tur hende. Analistanan di Rabobank a bisa cu esaki ta e crecimento di mas grandi den prijs den 10 aña.
Prijs a subi pa tur cos y no djis berdura, sino tambe pa carni, galiña, cuminda di lama, y tambe productonan di lechi.
Loke ta causando e aumentonan aki ta multiple asunto, pero e principal factornan ta inundacion, guera, y e pandemia. Varios inundacion desastroso a laga impacto grandi na partinan di Australia recientemente.
Pero corda cu e guera na Ucrania y e lockdownnan na China ta creando aumento drastico di prijs, incluyendo aumento barbaro den transporte via barco. E guera na Ucrania ta impactando e costo di energia, fertilizante, grano cu hariña, y azeta dushi.
